Menu

Ovidio Zapico y Ángela Valina axuntáronse esta mañana virtualmente colos Alcaldes de la formación pa coordinar acciones pa favorecer la recuperación de la crisis pol COVID19

IX Asturies reivindicó güei que los Conceyos puedan empezar a disponer del remanente municipal que, hasta la fecha, nun pudieron utilizar de resultes de la normativa estatal. Los alcaldes y alcaldeses de la formación axuntáronse güei colos diputaos autonómicos Ángela Vallina y Ovidio Zapico precisamente pa coordinar acciones comunes de cara a superar los efectos del confinamientu decretáu cola declaración del Estáu d'alarma.

Zapico aseguró que ye necesario desbloquiar esos remanentes por que les alministraciones locales puedan destinalos a la reactivación económica y a encarar les necesidaes de los sos residentes. "Punximos sobro la mesa les midíes que nos distintos conceyos asturianos gobernaos por Izquierda Xunida tán llevando a cabu pa desaniciar esta situación. Equí hai qu'esixir dende IX d'Asturies que los Conceyos puean yá disponer de los sos remanentes, que se clarifiquen les sos competencies pa destinar los mesmos y, sobremanera, que nós nun vamos aceptar nin tutelaxes, nin llimitaciones, nin imposiciones a los Conceyos asturianos per parte d'otra alministración".

El dirixente esplicó que l'alministración local tien de ser parte de les soluciones que se pongan en marcha pa enfrentar les consecuencies del COVID19. "Ye inmoral que los remanentes tean agora mesmo reteníos en cuentes corrientes de bancos. Hai que ponelos a disposición d'aquellos que son los que meyor conocen la so problemática local, que nun son otros que quien dirixen los conceyos asturianos".

Ovidio Zapico añedió que ye necesario esixir a l'Alministración d'Autonómica que se regule d'una forma clara tolo que tien que ver cola distribución de les EPIs nos distintos conceyos asturianos, que se faiga d'una d'una forma homoxénea y, concluyó, "que se refuerce ya impulse’l Plan Alcordáu de Servicios Sociales ente'l Principáu y los Conceyos porque éstos tienen qu'atender cada vez más partíes derivaes de les Ayudes d'Emerxencia".