Menu

Ovidio Zapico cree que nun tien sentíu qu'un Gobiernu progresista penalice a los territorios qu'apuesten pola sanidá pública calidable primando a les que que menos invirtieron en salú mientres presumíen de baxar impuestos a los más ricos

Izquierda Xunida d'Asturies reclamó güei una posición común, o siquier mayoritaria, ente les fuerces polítiques asturianes pa la repartida del fondu estatal pal COVID-19, atendiendo a criterios que nun perxudiquen a la Comunidá Autónoma. El parllamentariu Ovidio Zapico refugó güei que los territorios que más retayos fixeron en materia sanitario, con menor inversión per cápita y de PIB nos sos sistemes de salú, y líderes en rebaxes fiscales pa les grandes fortunes sían agora beneficiaes por una distribución que nun contempla, sicasí, l'esfuerzu d'otros territorios que sí apostaron por modelos médicu-hospitalarios públicos de calidá.

“Nun compartimos que'l criteriu de repartida prime la ineficiencia, prime'l retayu del gastu sanitariu, prime tamién la elusión fiscal. Yo creo que too esto ye un exemplu de lo qu'asocedió en Madrid, Comunidá Autónoma que menos porcentaxe del so Productu Interior Brutu (PIB) destina a sanidá y de menor gastu por habitante, que presume de suprimir l'impuestu de sucesiones y el de patrimoniu y que, amás, de resultes del criteriu pos ye la Comunidá que más sale beneficiada, al pie de Cataluña, que tamién ye otra pionera en retayu de gastu sanitariu”, afirmó'l dirixente.

Pal parllamentariu, nun tien sentíu qu'un Gobiernu progresista “perxudique” a les Comunidaes qu'invirtieron más en salú a cuenta de soportar un mayor esfuerzu fiscal, on una repartida qu'a quien más beneficia ye a les que fixeron de la baxada d'impuestos la so bandera ideolóxica”. Nesti sentíu, añedió Zapico, “faemos un llamamientu al restu de fuerces polítiques asturianes a buscar una posición común o siquier mayoritaria ante la repartida d'estos fondos estatales; una posición común que fortaleza a la posición del propiu presidente, Adrián Barbón, y que dexe una repartida más xusta, nel que la nuesa Comunidá Autónoma nun sala perxudicada, nun sala agraviada”.