Menu

Ovidio Zapico, reprocha que la planifiación se dexe en manos de CTA, qu'actúa con criterios mercantilistes tal que dixo la Sindicatura de Cuentes

Izquierda Xunida pidió güei una solución definitiva pa los problemes de tresporte escolar que tán dexando, casi con lliteralidá, na carretera, a neños y neñes de zones rurales, nuna situación na que se tán primando los intereses económicos frente al cumplimientu del derechu a la educación. El diputáu Ovidio Zapico, acompañáu poles alcaldeses de Riosa y Teberga, Ana DíaZ y María Amor Ardura, l'alcalde de Quirós, y la conceyala d'IX en Siero, Teresa Álvarez, denunció una situación que, recordó, nun ye nueva y que se repite “un añu más”. Les dificultaes afecten non yá a les zones de poblamientu esvalixáu sinón tamién a centros d'educación especiale, resaltó Zapico, pa quien esiste un puntu d'inflexón a partir del que too empieza a empiorar: “tenemos estos problemes dende l'añu 2012, cuando un alcuerdu del Gobiernu introduz novedaes al respective de lo que viniera siendo la xestión tradicional del tresporte escolar, que correspondía única y puramente a la Conseyería d'Educación. Dende 2012, entra tamién nesta planificación el Consorciu de Tresportes d'Asturies (CTA) y cueye amás el pesu de la planificación, de la organización, d'estes y, evidentemente, esto xenera un problema, porque yá nun prima l'interés puramente académicu, l'interés de dar serviciu a cada neñu o neña d'Asturies, con independencia del so llugar de residencia, sinón qu'entren tamién en xuegu criterios mercantilistes”.

Ovidio Zapico esplicó que la primacía del negociu frente a la educación nun ye una denuncia ensin base, sinón que vien respondida dende otres instancies de control. “Y esto non lo diz Izquierda Xunida, esto tamién lo diz la Sindicatura de Cuentes, nun informe que, sobro'l tresporte escolar nel cursu 2017-2018 realiza dempués de faer la correspondiente fiscalización”.

La situación ye, a xuiciu del diputáu, especialmente sangrante, toa vez que los problemes nun son nuevos y repítense de forma sistemática. “Anguaño tenemos Vixidel en Teberga, La Rebollá en Riosa, Tene en Quirós, Villanueva en Siero, qu'afecten a escolares d'esos núcleos. Ye que daqué falla. Si nun somos capaces de planiar primero yá una solución que dea respuesta, que dea seguridá a qu'eses families tengan garantizáu'l tresporte primero qu'empiece el cursu ye que daqué se ta planiando mal”.

Los defectos na garantía del tresporte a los centros escolares, d'acordies con Ovidio Zapico, tien implicaciones nel modelu poblacional que pretende impulsase n'Asturies. “Ye un problema que va muncho más allá del ámbitu puramente educativu, ye un problema qu'afecta a unu de los núcleos de lo qu’habría ser la política n'Asturies, que ye la política demográfica”. Nesti sentíu, ironizó'l diputáu, sobren delles iniciatives si a la fin les conclusiones a les que se lleguen son meres obviedaes. “Nun ye necesario contratar al señor Jaime Izquierdo, crear un Comisionáu pal Retu Demográficu pa llegar solamente a les conclusiones de qu'Asturies tien una población esvalixada y que tenemos munches dificultaes orográfiques y que ye difícil tener una vida ordenao y afayadizo nel mediu rural. Eso yá lo sabemos. Si tenemos un comisionáu pal Retu Demográficu ye pa dar soluciones a problemes como ésti; que nun haya neños y neñes n'Asturies que tengan eses dificultaes tan series p'aportar a un derechu fundamental como ye'l derechu a una educación pública, gratuita y calidable”.

Los problemes de tresporte nun afecten puramente a estudiantes ensin atender, sinón tamién a otros munchos que tienen qu'ampliar de forma estraordinaria la so xornada escolar, teniendo de tar preparaos de madrugada pa poder llegar a los sos centros: “eso ta pasando en pueblos d'Asturies; coyendo tresporte escolar a les seis y cuartu de la mañana por una cuestión puramente económica”.

Los problemes dacuando son tan risibles como'l que se produz en Siero, onde los autobuses pa escolar lleguen hasta una zona pero los de secundaria non, ensin nenguna razón que la xustifique pero dexando ensin serviciu a un escolar.