Menu

Ovidio Zapico y Marián Iglesias coinciden na necesidá de poner en marcha “proyectos tractores” con capacidá pa xenerar emplegu y actividá económica frente a la despoblación

Izquierda Xunida va defender el desenvolvimientu de “proyectos tractores” pa la xeneración d'emplegu y actividá n'Ayer. El diputáu y coordinador xeneral de la formación, Ovidio Zapico, aseguró güei que van defender el desenvolvimientu d'un polígonu industrial en Corigos, por aciu un conveniu ente Conceyu y Principáu por que pueda ponese en marcha esti nuevu polu industrial, sobro unos terrenes yá de titularidá pública pero n'estáu d'abandonu.

La iniciativa, impulsada dende IX Ayer, llega, a xuiciu de Zapico, nun momentu oportunu: “cuando una gran estensión de suelu industrial qu'atesoraba'l centru d'Asturies, que, mientres bien de años fuera, desgraciadamente, un reservorio de plumeros de la pampa, y agora ye, o a lo menos yá ta siendo una fonte de movimientu de tierres y d’operarios trabayando en redol al polígonu de Bobes (Siero), y a tolo que se ta vendiendo d'eses parceles, yo creo que llega'l momentu d'empezar a planiar otros polígonos industriales notres zones d'Asturies que dexen dir xenerando esa actividá económica amestada a los territorios”.

El coordinador d'IX axuntóse esta mañana cola executiva de la formación n'Ayer pa encetar acciones coordinaes. La vocera d’IX Ayer, Marián Iglesias, reivindicó una transición enerxética xusta, daqué que, na so opinión, solo va ser posible si ponemos en marcha proyectos con capacidá pa xenerar actividá económica nos territorios afectaos. La situación actual, señaló la dirixente ayerana, ye de ciertu abandonu y un exemplu ye l'abandonu de los terrenes que, nel so momentu, plantegárense pa desenvolver el polígonu industrial de Corigos. “Precisamos que dende'l Principáu, dende'l Conceyu, dende tolos organismos tiremos por qu’equí yá pueda urbanizase y asitiar empreses, que vengan de fora y que creen puestos de trabayu p'asina asitiar población, qu’esta zona ta quedando prácticamente ensin población: la xente ta diéndose en busca de trabayu”.

Ovidio Zapico resaltó que cualquier llogru ye frutu de la esixencia na cai y nes instituciones y, nesti sentíu, exemplificó col recién anunciu de les multimillonaries inversiones anunciaes por Arcelor Mittal, que llegaron dempués d'un clamor de tola sociedá asturiana pa defender el so sistema granible. “Los asturianos somos un pueblu que tamos acostumaos a lluchar, al que nunca se -y regaló nada y tolo que se consiguió siempres ye frutu de la movilización, política, social, sindical”.