Menu

Ovidio Zapico y Ángela Vallina refuguen entemecer la reconocencia de "derechos" con discutinios económicos y sollerten de que si non se cumple'l calendariu propuestu la reforma del estatutu puede ser fallida

Izquierda Xunida va estudiar la propuesta de Foru para la Oficialidá magar precisó que ye necesariu realizar dos negociaciones paraleles ya independientes: una para la reforma del Estatutu y otra para lo referío a los presupuestos. Sía que non, el coordinador xeneral de la formación, Ovidio Zapico, y la vocera parlamentaria, Ángela Vallina, repitieron esta mañana, a entrugues de la prensa, la disponibilidad a la negociación pero, eso sí, respetando identidaes y principios básicos. Asina, para IX, señaló Zapico, como una fuerza "firmemente comprometida col Estáu Social y cola so construcción pos, evidentemente, topeta cola posibilidá d'esaniciar impuestos a les rentes altes, impuestos como ye'l casu de sucesiones".

Frente a elementos que xeneren distorsión, IX defende poner de forma prioritaria la reforma del Estatutu para la oficialidá n'una negociación que nun incluya elementos ayenos a la mesma reforma estatutaria. "A un derechu nun se-y pon preciu nin s'axusta con dineru", hai enfatizado Ángela Vallina. Pela so parte, Ovidio Zapico señaló que nun se puede restar importancia al calendariu: "los plazos son bien importantes. Nós, y xuntu con Podemos Asturies, presentemos yá va seis selmanes un calendariu qu'entendemos que ye l'únicu calendariu que dexaría concluyir la tramitación, non n'Asturies, refiérome al Congresu de los Diputaos, que ye onde remata la tramitación definitiva del Estatutu nel marcu d'esta Llexislatura. Tolo que sía dir más allá del calendariu que nel so momentu IX y Podemos proponíamos va suponer qu'averemos, acaldía más, a una reforma del Estatutu que pueda ser fallida".

Respondía asina'l coordinador xeneral a entrugues de periodistes sobro l'últimu allugamientu del Gobiernu d'Asturies, que güei mesmu plantegaba en distintos medios que l'alcuerdu ye más importante que los plazos. Nesti sentíu, sobro la posibilidá de que'l cambéu de camín del Executivu d'Adrián Barbón pudiera responder a una "dilación intencional", Zapico señaló que quien tendría d'esclarialo ye'l mesmu Gobiernu. "Yo quiero presuponer la so bona voluntá" y quiero presuponer que tienen el compromisu políticu qu'adquirieron nel so momentu cola ciudadanía asturiana de, non yá empecipiar -que yá se fixo- l'alderique sobro la reforma, sinón de llevar esta a la Xunta Xeneral, que se vote na Xunta Xeneral y que lo faigamos nel plazu de tiempu abondu que dexe concluyir la mesma en Madrid, nel Congresu".