Menu

Ovidio Zapico asegura que nun habrá baxaes xeneralizaes" d'impuestos y caltien la negociación sobro la ecotasa pal presupuestu de 2022

Les conversaciones pa llograr un pactu presupuestariu ente IX y PSOE siguen y les meyores dexaron yá'l compromisu del Gobiernu p'actualizar los baremos por daños de la fauna selvaxe y, tamién, por que los pagos lliberense nun máximu de trés meses, a lo llargo del añu próximu. El diputáu y coordinador xeneral de la formación, Ovidio Zapico, destacó, nel planu fiscal, que se refuguen baxaes xeneralizaes d'impuestos.

"Güei, de lo que quiciabes más satisfecha pueda sentise Izquierda Xunida, ye que, en materia de daños de la fauna selvaxe, tenemos el compromisu de que, a lo llargo del mes de xineru va ver la lluz l'actualización del baremu de daños, daqué bien importante, y que se venía reclamando pol sector dende va muncho tiempu, y que, per otru llau, tenemos tamién el compromisu del Gobiernu de que, a lo llargo de 2022, va llograse, ente que se produz el dañu y esti cóbrase, que'l plazu nun supere los trés meses".

Tres dos tales xuntes ayeri y güei, los contactos tán intensificándose, magar entá nun puede dase por fechu'l sentíu de votu d'IX. "Hai inda cuestiones enriba de la mesa, y cuestiones a les que tenemos que siguir avanzando mientres los próximos díes na negociación". señaló'l diputáu, esplicando, que, ello ye que nin siquier puede avanzase una fecha pa convocar la Coordinadora na que tien d'encetase la propuesta definitiva de les cuentes d'Asturies pal añu próximu.

En materia fiscal, Zapico aseguró que nun hai previsiones de baxaes d'impuestos con calter xeneral: "eso ye daqué, tamién, pa IX, positivo, que podamos siguir calteniendo la fiscalidá tal que ta establecida anguaño". Eso sí, reconoció, "tenemos dificultaes tocantes a la ecotasa, que nun tenemos inda un puntu de vista de mancomún, pero vamos siguir forfugando'l diálogu y la negociación en busca del alcuerdu y de qu'esti contenga les mayores traces identitarios pa IX posibles".