Menu

Zapico reprocha que'l Gobiernu arrenuncie a lluchar contra la burocracia n'asuntos sociales y denuncia qu'hai entidaes qu'esti mes nun van poder pagar sueldu nin estraordinaria pol atascu en Derechos Sociales

Izquierda Xunida va dar la batalla tamién na Federación Asturiana de Conceyos (FACC) contra la Llei calidable Ambiental. Los alcaldes y alcaldeses de la formación yá pidieron una xunta, por seguda vegada, por que la entidá encete una reforma llegal que va cargar a los Conceyos de nueves competencies y responsabilidaes para les que nun cunten con recursos humanos y técnicos necesarios y que les sos implicaciones pueden suponer importantes perxuicios para les alministraciones locales. El coordinador xeneral, Ovidio Zapico, y la vocera parlamentaria, Ángela Vallina, axuntáronse güei con rexidores d'IX n'Asturies pa encetar les estratexes paraleles a l'acción parlamentaria frente una reforma lexislativa que, aportunaron, regresiva y d'altu impactu tamién en materia de salú pública.

Zapico recordó qu'IX ye la segunda fuerza político nel ámbitu municipal, con 9 alcaldíes. D'elles, toes refuguen la nueva norma qu'impulsa'l Gobiernu. L'oxetivu agora ye emplegar el branu pa siguir "texendo aliances" que dexen llograr en distintos frentes baltar la nueva Llei de Calidá Ambiental. La ofensiva municipal súmase a la yá empecipiada con colectivos conservationistes y ecoloxistes, con Comisiones Obreres, y, a lo llargo de xunetu, con otres entidaes.

Colos alcaldes, esplicó Zapico, encetóse la Llei y les sos implicaciones pa los conceyos. "Esmoleznos n'IX estes implicaciones, porque, más allá de tol esbarrumbe de control qu'hai nesta Llei que yá denunciemos más vegaes, implica tamién pa los conceyos asumir más responsabilidaes en cuenta de nada. Tamos de nuevu énte un contenedor, el del Conceyu que recibe una competencia más y que, a cambéu, nin tien más personal, nin tien más recursos pa poder un serviciu que, per otra parte, y nel casu d'esta Llei, nun quier dar".

Pa Zapico ye imprescindible que la FACC pronúnciese sobro la llei, daqué qu'hasta agora nun asocedió yá que, llamentó, "nel Parlamentu nun sabemos lo qu'opina la Federación Asturiana de Conceyos, porque'l día que tenía que comparecer la Presidenta énte la Comisión, escusó la so presencia".

L'Alcaldesa de Riosa y vicepresidenta de la FACC, Ana Díaz, reprochó que, una vegada más, cargase a los Conceyos con unes competencies, unes obligaciones, que pueden tener graves consecuencies pa les alministraciones locales. "Entendemos que, dende la FACC, ye onde tenemos d'aldericar y onde tenemos d'aportunar que los Conceyos nun tenemos eses capacidaes".

La rexidora esplicó que se-y unvió, per segunda vegada, una carta a la máxima responsable de la FACC por qu'hubiera un pronunciamientu esplícitu sobro la Llei de Calidá Ambiental. La respuesta ye una próxima xunta –la fecha entá nun se dio a conocer– p'aldericar les implicaciones del cambéu normativu. "Los Conceyos nun podemos siguir teniendo estes competencies y esta Llei ponnos otra vegada en problemes".

Ovidio Zapico amosóse convencíu en que, frente a les afirmaciones del Gobiernu de que los alcaldes asturianos son favorables a la llei, tal consensu nun esiste y non solo ente rexidores d’IX Asturies. Nesti sentíu señaló qu'amás de los Conceyos en manos del PSOE esisten otros, d'otres fuerces que, probablemente refuguen el cambéu lexislativu.

L’alcalde de Morcín, Maximino García, criticó que, hasta agora, la FACC nun encetara la normativa que, al so xuiciu, tendría d’aldericase nel senu de la Federación, tanto poles implicaciones de cara a la responsabilidá municipal, como pol grau d'arbitrariedá que se va abrir na tramitación coles declaraciones responsables, que pueden llevar a distintos graos de permisividá.

El Gobiernu arrenuncia a la llucha contra la burocracia social

Ovidio Zapico refugó la falsa dicotomía remanada pol Gobiernu d'Asturies pa xustificar la Llei de Calidá baxu una supuesta axilización de los procesos alministrativos: "guerra a la burocracia, sí, pero a la burocracia social, que siguimos recibiendo día tres díes quexes en redol a la Conseyería de Bienestar Social, con una problemática qu'afecta a les persones más vulnerables y en servicios esenciales. Y ende, yo creo que'l Gobiernu arrenuncia a faer esa guerra a la burocracia. Fai la guerra a la burocracia que-y manden los intereses empresariales, apiguraos en redol a la Cámara de Comerciu d'Uviéu".

Y mientres esa dexadez colos problemes sociales sigue, señaló Zapico, "siguimos recibiendo quexes, inda ayeri con bien de d'eses empreses que trabayen pal ERA, que tán nuna situación bien difícil, porque va munchos meses que tienen cortáu cualquier tipu d'ayuda económica, nun llega'l dineru.". De resultes d'esta situación, según el diputáu, dalgunes d'estes compañíes yá anunciaron que nun van pagar a los sos trabayadores en xunetu nin el sueldu nin la paga estraordinaria: "eso sí que ye grave y, ende, yo creo que'l Principáu tendría qu'entainar esa guerra contra la burocracia y faer una alministración social al serviciu de les persones".