Menu

Ángela Vallina reprocha la demagoxa de la baxada d'impuestos pa les clases más pudientes nun momentu nel qu'aumenten les necesidaes y Europa reivindica la necesidá d'una fiscalidá que grave la riqueza.

IX emplazó güei al presidente, Adrián Barbón, a axustar un presupuestu pa la mayoría social, que dexe encarar l'exerciciu 2023 con recursos abondos p’atender a les consecuencies de la guerra d'Ucrania. Frente a les midíes populistes d'Andalucía y Murcia, güei mesmo defendíes pol PP asturianu, la vocera d'IX, Ángela Vallina, reclamó anteponer les necesidaes de la xente corriente, "nun pensando nos trés mil ricos que paguen l'impuestu de patrimoniu sinón nos novecientos noventa mil que precisen d'una fiscalidá progresista y progresiva por que la sanidá, la educación, los servicios sociales, la xusticia, les nueses carreteres y xeneral los nuesos servicios públicos sirvan y sírvanlos. A eso lu emplazo".

A pocu más de seis meses de la disolución de la Xunta, Vallina, esixó que s'aproveche hasta l'últimu día "p’ameyorar la vida de la xente". Nesa xera, na que definió como una "llexislatura difícil", según la parllamentaria, IX contribuyó a dar "estabilidá", tantu sofitando decisiones del Gobiernu como con propuestes defendíes nel Parlamentu. "Asina foi en tolos presupuestos que sometió a la considerancia d'esta Cámara, y que s'axustaron con esta fuerza político. Asina foi, tamién, na Llei de garantía de derechos y prestaciones vitales o nes decisiones derivaes de la xestión sanitaria de la pandemia de COVID 19, daqué que marcó non yá namái la llexislatura sinón nueses mesmes vides, les de toes y cada una de nós. Tamién nes midíes implementaes p’ayudar a los colectivos que con más intensidá sufrieren les consecuencies de la pandemia. Toes elles tienense aldericaes y axustaes con IX y sofítense. Y faise, señor Presidente, porque la negociación y l'alcuerdu ta nel ADN de la nuesa formación política, y tamién porque tamos persuadíos de que fuerces polítiques series y tamién responsables, como la suya y la mía, y especialmente nes difíciles circunstancies que tuvimos qu'encarar, tienen de contribuyir a dar estabilidá a les instituciones y enfotu a la ciudadanía".

Ángela Vallina destacó l'esfuerzu realizáu pa xestionar les diferencies y desencuentros, como los que se producieron poles discrepancies cola política -la so "ausencia", en palabres de la diputada- en materia d'industria, fondos europeos o, agora, cola Llei calidable Ambiental, que pa la formación supón que, "llueñe de faer honor al so nome, vien amenorgar sustancialmente los estándares de protección del mediu ambiente y a enxaretar a los conceyos una competencia impropia y ensin da-yos recursos pa xestionala, porque eso, ye, a última hora, lo que ta favoreciendo esa llei na que tán ustedes encerriscaos".

Esa estabilidá, matizó Vallina, "nun significa nin pensamientu únicu, nin que'l procesu fuera fácil. Tuvimos y tenemos discrepancies, dalgunes d'elles non menores". Sicasí, la necesidá de dar respuestes a los problemes d'Asturies obliga, hai enfatizado, a "encapsular desavenencies concretes, dexándoles a un llau, pa poder avanzar y dar soluciones a otros asuntos nos que les coincidencies son mayores y de que la so resolvimientu depende'l día ente día de muncha xente"

Esa capacidá de llegar a alcuerdos ye especialmente necesaria nunos momentos onde, a xuiciu de la vocera d'IX, desenvolvióse una nueva forma de faer política na que, desgraciadamente, el ruiu y la roxura, en demasiaes ocasiones a ritmu de tuit, imponse al diálogu y la negociación. Quiciabes por esi histrionismo que güei paez apoderóse de la vida pública, dalgunos estráñense de que persones y organizaciones que nun piensen igual puedan llegar a alcuerdos. Y, sicasí, dende'l nuesu puntu de vista, esa capacidá d'alcordar ente distintos ye la esencia mesma de la política, na que ye necesariu dicir en voz alta cuando se discrepa, con claridá, honradamente y con tresparencia. Y de la mesma, cuando se algamar consensos, porque la impostura nun enllena les neveres, nin ameyora los salarios o garantiza xuna educación y xuna sanidá pública".

Frente a les consecuencies de la guerra, Vallina defendió la necesidá de cuntar colos presupuestos como xuna ferramienta pa encarar los retos qu'esi contestu contrariu acarreta pa les clases medies y trabayadores de la nuesa Comunidá, esto ye, pa la mayoría de nós y nós va tener, ta teniendo yá, ello ye que la guerra d'Ucrania.

Refugu a baxada d'impuestos a les clases más riques

La sesión plenaria de güei tamién punxo de manifiestu les clares discrepancies nel modelu de recaldación ente Izquierda Xunida y el PP. Ángela Vallina anunció'l refugu a cualesquier rebaxa fiscal empobinada a les clases más pudientes, como'l de patrimoniu qu'afecta a quien tienen xuna fortuna cimera al millón d'euros, que se correspuende con poco más del 1% de la población asturiana. La vocera d'IX enfeó a conservadores una posición que, al so xuiciu, debilita al país: "cómo puede defendese al empar, y col mesmu frenesí la unidá d'España y la secesión fiscal como fai'l Partíu Popular".

La diputada recordó que, nos últimos meses, ta plantegándose, precisamente, un alderique de signu contrariu, empobináu a una harmonización impositiva ya inclusive amontar la presión fiscal a la riqueza, non yá dende los partíos de la esquierda, sinón dende la mesma Unión Europea y hasta el presidente norteamericanu Joe Biden. "¿Quién se punxeron d'uñes frente a esa propuesta, que por cierto vien de daquién tan poco sospechosu de comunista como'l señor Biden, los países que basen la so competitividá en baxos salarios, baxos impuestos y baxa protección social. Esos son los que s'asitiaron, los países más desiguales. N'España, la campeona mundial d'esa fiscalidá paradisiaca pa los ricos ye la señora Ayuso (Isabel Díaz, presidenta de Madrid), que-y perdonó 1.000 millones d'euros a 18.000 ricos en plena pandemia". Y agora, añedió Vallina, a esa comunidá suma la d'Andalucía, coles propuestes del "moderáu" Moreno Bonilla (Juan Manuel, presidente de la comunidá andaluza), que quier incorporar Andalucía a esi grupu encabezáu per Madrid d'esa aberración fiscal na que los ricos nun paguen impuestos y los probes sí". Lo por, aprofió, ye que'l restu del PP "báilla-yos l'agua con propuestes tan absurdes como la qu'agora tamos aldericando equí, demostrando que nun son el partíu de la xente corriente, nun lo son, sinón de les empreses eléctriques, el de los bancos y el de los ricos que tienen patrimonios cimeros a un millón d'euros".

Ángela Vallina acusó a los populares d'impulsar un modelu de sociedá onde los ricos nun paguen y son los probes quien tienen que cargar con con esa amenorga d'ingresos pal estáu. "Paez-yos bien que los ricos nun paguen, pero sí que los suplan el 99,8 per cientu de la xente común y corriente. Esa ye la sociedá qu'ustedes defenden, la de la desigualdá absoluta y la permanencia de la riqueza en cuatro manos".

El planteamientu fiscal del PP, nel que defenden el privilexu y los intereses d'una minoría ye, a xuiciu de Vallina, incomprensible: "nin qu'ustedes formaren parte d'esi club. En concencia, ye xenial pertenecer a esi club y tener soldaos que son comunes y corrientes y que salen a defendelos y a partise la cara por ellos. Ye risible, perdone que-y diga, pero pa mi entender ye risible. La nuesa fuerza político cree na igualdá, na función redistributiva de la fiscalidá. Yo, son los valores qu'inspira la Constitución, nun sé en qué creen ustedes, en concencia, na Constitución non".