Menu

Ovidio Zapico, Juan Gascón ya Israel Ruíz Salmón, al pie de la responsable federal de mediu ambiente, Eva Sempere, participen güei nel III Cumal sobro esti espaciu coles mires d'ameyorar una xestión ensin visión global de la redolada y qu'esbardia los recursos p'asegurar protección y caltenimientu con un desenvolvimientu humanu sostenible

Izquierda Xunida d'Asturies, Cantabria y Castiella y Llión van llevar un programa común nes trés comunidaes autónomes al respective de cómo tien de ser la xestión del Parque Nacional de Picos d'Europa. Les trés federaciones celebren güei en Riañu, Llión, la que yá ye'l so III Cumal, precisamente, pa cerrar una acción coordinada que dexe aprovechar al máximu los recursos d'esta redolada única, de la que se garantiza'l caltenimientu, la protección y el desenvolvimientu humanu sostenible. Criterios económicos racionales y sofitaos sobro informes técnicos, xestión del territoriu y control de la fauna atendiendo a les necesidaes de conxuntu del parque y con visión integral son dalgunes de les cuestiones que, nestos momentos, alderiquen dirixentes locales, autonómicos y federales pa llograr una posición común que s'incorpore como propuesta concreta y compartida nes trés comunidaes autónomes.

El coordinador xeneral d’IX Asturies, Ovidio Zapico, marcó como primer finxu incorporar nos trés programes electorales de cara a 2023 acciones compartíes. "Creo que tien que tener un oxetivu políticu bien claro: abondar na coordinación dende los nuesos respectivos ámbitos, na capacidá que tengamos d'incidencia, pa esixir a los nuesos gobiernos autonómicos xuna mayor coordinación na xestión del parque; avanzar, tamién, al traviés d'esa mayor coordinación, escontra una uniformidá nos criterios medioambientales de la xestión, anguaño bien desemeyaes".

Pa Zapico, tamién ye necesario qu'IX aproveche la so capacidá pa "reorientar" les partíes económiques del presupuestu del parque que dexen definir la inversión nesti espaciu.

La visión de IX Cantabria

El coordinador de IX Cantabria, Israel Ruiz Salmón, esplicó qu'esti procesu de coordinación coles otres dos comunidaes poles que s'estiende'l parque nacional de los Picos d'Europa, ye xuna respuesta, precisamente a "inacción" de los gobiernos de caúna d'elles, qu'hasta'l momentu nun fueron capaces a llograr una coordinación real na xestión y usu d'esti espaciu que, dixo, "tien una gran trescendencia non yá porque foi'l primeru que se llevó a cabu nel país, sinón tamién poles implicaciones que tien al allugar una idiosincrasia bien propia, qu'amás ta compartida por trés alministraciones, coles dificultaes qu'esto trai, pero, precisamente porque hai dificultaes, les trés alministraciones tendríen de poner más del so parte".

IX Castiella y Llión, anfitriona del III Cume

IX de Castiella y Llión foi la anfitriona d'esti III Cumal que remata'l procesu que s'empecipiara en Cangues d'Onís, a instancies d’IX Asturies, y siguió en Potes, Cantabria. Agora, nesti nuevu alcuentru punxéronse de mancomún los trabayos desenvueltos con anterioridá pa cerrar posiciones comunes, compartíes y que puedan ser defendíes nos trés territorios.

El coordinador xeneral d’IX Castiella y Llión, Juan Gascón, anfitrión d'esti tercer cumal, defendió la necesidá de "ameyorar" una xestión de forma coordinada, daqué que, nestos momentos, nun se produz. Otra manera, la política del Gobiernu autonómicu falla empezando polos sos propios resposables. "El Parque Nacional tien munches coxeres, empezando pola mesma Castiella y Llión, con un Conseyeru que nun tien el Mediu Ambiente non yá como una prioridá política sinón que lo utilicen como una forma de confrontación, en cuenta de tener un planteamientu más inclusivu, más integrador como tien IX". Y ye que, según Gascón la Xunta de Castiella y Llión, que ta más esmolecida en xenerar conflictos qu'en solucionar problemes concretos, nesti casu, pa la población rural". Frente a ello, defendió un usu de los recursos que dexe ayudar na redolada rural y que la población pueda asitiase. "Creemos que ye positivo y que podíen ameyorase munches coses; qu'hubiera más mocedá, que pudiera asitiase nestos conceyos de la zona de Picos y contorna y creo que ye positivo que, nesi sentíu, siga trabayándose políticamente".

El responsable castellanlleonés enfatizó que tamién ye imprescindible "xenerar sinerxes con trabayadores del Parque Nacional", teniendo en cuenta los problemes que tán plantegando por una falta de coordinación, énte la falta de "una directriz política que dexe esa coordinación y, tamién, que se tenga en cuenta la parte técnica d'informes pa la realización d'esto que llamen control poblacional que, en realidá, pos nun dexen de ser actividaes cinexétiques que tán más empobinaes a satisfaer les necesidaes de cazadores que non en beneficiu de la poca población local y de cómo eso ye positivo pa les redolaes nes que se realicen". Amás, reseñó la necesidá de buscar "sinerxes" al respective de la biodiversidá.

Ruiz Salmón anunció qu'IX pretende llograr güei xunas conclusiones coordinaes y comunes que tienen de sirvir pa la xestión de la redolada y, tamién, pa dexar el desenvolvimientu sostenible de les comunidaes humanes ellí asitiaes. Ente les cuestiones qu'amenen consensu, el dirixente cántabru, refirióse a los recursos económicos que s'embaraxen pal próximu plan rector con una duración de diez años y que, al so xuiciu, son insuficientes. "Ye necesariu que más recursos lleguen y que los recursos que lleguen sían destinaos precisamente al Parque Nacional y nun se deriven n'otres midíes distintes".

Al pie de los coordinadores de les trés federaciones tamién participó la responsable federal de Mediu Ambiente d’IX Eva Sempere.