Menu

El coordinador xeneral d'IX y candidatu de Convocatoria por Asturies, Ovidio Zapico, sollertó güei del riesgu d'estazar los terrenes de l'antigua Alcoa, pa los que pidió una pilastra industrial qu'asegure empléu calidable y actividá granible.

Zapico visitó güei l'enclave al pie de miembros d’IX Avilés y Gozón, quien criticaron la falta de proyectos reales que dexen recuperar los puestos de trabayu perdíos.

La posible fragmentación d'estos terrenes industriales ye, a xuiciu de Zapico, una demostración más de la falta de política industrial del Gobiernu d'Asturies a lo llargo d'esta llexislatura, na que’l Gobiernu foi incapaz de plantegar acciones concretes pa reforzar el texíu granible fabril de la comunidá autónoma.

Recuperar la contorna como llocomotora del empléu industrial

P’Agustín Medina, d’IX Avilés y númberu 2 de la llista de Camuda Avilés, la contorna precisa recuperar el so protagonismu como llocomotora económica d'Asturies, con un nuevu modelu granible industria y sostenible. Asina, esplicó, la so formación lleva como oxetivu pal próximu mandatu que s'instale nel conceyu la nueva Axencia de Competitividá Empresarial ya Innovación Asturiana. “Pensamos que ye una oportunidá d'oru esta axencia que va echar a andar agora. Hai 30 años, en Llanera, instalaron l’IDEPA coles mires de crear ellí un microcosmos, un campu de cultivu qu'atraxera nueves empreses y cumplió l'oxetivu: queremos daqué paecío n'Avilés”.

Medina defendió la necesidá de poner en marcha un plan d'innovación industrial empobináu a atraer empreses tractores ensin esperar a que vaigan surdiendo.

Esti programa de remocicamientu y modernización del texíu granible tien qu'incluyir tamién el refuerzu d'una actividá industrial tradicional na economía avilésina rellacionada col aceru. Asina, Medina reclamó la instalación d'un fornu altu eléctricu n'Avilés.

Al pie de ello, defendió la necesidá de soterrar les víes, Ronda norte o l'enllaz ferroviariu al aeropuertu como parte de lo que tien de ser un plan global que dexe rellanzar la contorna avilesina.

El zarru d’Alcoa supunxo un varapalu non yá dende la perspectiva del empléu, cola perda de 300 puestos directos, sinón tamién por amenorgar nos ingresos municipales. Cesar Fidalgo, candidatu d'IX Convocatoria per Gozón, recordó que la desapaición de l’Aluminera supunxo un duru golpe pal financiamientu del Conceyu, que dexó d'ingresar un millón d'euros poniendo, añedió, “bien en riesgu la facienda local”.

Dende IX, reivindicó Fidalgo, “apostamos dende'l minutu unu pola recuperación de l'actividá industrial en Alcoa, na contorna como un sector económicu con empléu calidable, altu valor añedíu y que ponga en valor tamién terrenales como pueda ser el nuesu polígonu de Maqua”.