Menu

El Secretariu d'Organización d'IX pregúntase si los socialistes van poner “un tarifazu” a tolos asturianos pa pagar la incompetencia de Mediu Ambiente

Ángel González, Secretariu d'Organización d'IX d'Asturies, emplaza a la Viceconseyera de Mediu Ambiente a esplicar quién, cuándo y cómo van pagar los 250 millones que va costar la macroincineradora.Ángel González amosó güei la so sorpresa poles declaraciones de la Viceconseyera de Mediu Ambiente nes qu'afirma que “la incineradora nun va suponer desembolsu pa les alministraciones públiques”. Nesti sentíu González asegura que “nesti país nenguna alministración puede licitar una obra ensin pagala. Les palabres de Belén Fernández recuérdenme a aquel xuegu de Maxa Potagia”. El Secretariu d'Organización d'IX piensa que la Viceconseyera tendría de ser más rigorosa y dar les esplicaciones que se merecen los asturianos.

“Rescampla que la incineradora va pagala Cogersa, esto ye, un consorciu públicu formáu la Conseyería d'Infraestructures y los conceyos, que se manden pol réxime xurídicu de les alministraciones públiques”, aportuna González, el que repostia que lo que tien que faer Mediu Ambiente ye esplicar si van pasar la factura a los ciudadanos con un “tarifazu” nel recibu mensual pa pagar la so incompetencia na xestión de basures.

González considera que la Viceconseyería de Mediu Ambiente ocupa'l vagón de rau nel cumplimientu del alcuerdu de Gobiernu. “Nun fixo prácticamente nada de lo recoyío nel alcuerdu de Gobiernu robláu cola FSA. Creo que tendría de centrar los sos esfuercios en cumplir lo apautao y en dexar de ser el farolucu coloráu nesti ránking de cumplimientos”, conclúi'l Secretariu d'Organización d'IX.