IX propón que’l Parlamentu asturianu condergue’l franquismu de forma firme y contundente.

20/06/2013. http://www.izquierdaxunida.com/index.php?seccion=noticia&id=11079

El grupu parlamentariu d’IX na Xunta Xeneral acaba de rexistrar una Proposición Non de Llei cola que pretende que’l parlamentu asturianu realice una condena firme y contundente del franquismu, la reconocencia del derechu a la verdá y l’arreglu dignu de toles víctimes y el sofitu a la querella qu’en Bonos Aires lleva la maxistrada María Servini de Cubría por delitos de xenocidiu y lesa humanidá contra los responsables de la conculcación de derechos humanos demientres el franquismu. Asina resumió esta iniciativa Aurelio Martín, el diputáu d’IX que va defender la Proposición Non de Llei nel plenu de la cámara nel próximu periodu de sesiones, a partir del mes de setiembre. El testu foi dáu a conocer esta mañana pol diputáu d’IX, el voceru parlamentariu del grupu, Ángel González, integrantes de l’Asociación Lázaro Cárdenes, -asociación integrante de la Comisión de la Verdá- y representantes de lluchadores antifranquistes asturianos-. A la so llucha y la so reconocencia, sorrayaron Martín y González va dedicada esta iniciativa. Un testu bien similar cuenta nel parlamentu vascu col sofitu de la PNV, el PSOE y Bildu.

Jesús Montes Estrada, representante de l’Asociación Lázaro Cárdenes, sorrayó la importancia de la querella presentada n’Arxentina como “absolutamente determinante pa discernir tou lo que pasó dende 1936 a 1977, dende crímenes de guerra hasta robos de neños”. De la mesma, incidió en qu’amás de les declaraciones de familiares y testigos, l’abogáu de la causa arxentina espera ordes internacionales pa entrugar a delles persones, ente elles trés exministros vivos, Martín Villa, Utrera Molina (suegru de Ruiz Gallardón) y Fernando Suárez. “Solo pretendemos contribuyir dende Asturies al llabor de la Plataforma de La Verdá en base de primeres de xusticia universal”, esplicó “Churruca”, quien recordó’l llabor de Baltasar Garzón “empapelando a Pinochet”.

Ángel González, voceru parlamentariu d’IX na Xunta Xeneral, llamentó qu’haya qu’allegar a demandes internacionales pa que nesti país nun sía posible resolver lo que n’Alemaña o Austria fíxose rápido y amosó’l so pesar por que nun tea resuelta “la enorme delda que tenemos colos mesmos demócrates”. “Pidimos esculpes a tanta xente por tar trabayando con tanto tiempu de retrasu, cuando se cumplen 77 años del golpe fascista”, dixo.

Al so xuiciu, la Proposición Non de Llei presentada güei ye una oportunidá pal parlamentu asturianu de condergar la violencia. Esperamos que d’una vegada entienda qu’esto hai que superalo. Nun creo que naide vaya a defender el golpe d’estáu y la dictadura”, argumentó en referencia a los partíos de la derecha. González afirmó querer una sociedá pacífica y con diversidá d’ideoloxíes y animó a que nun se siga escondiendo la nala debaxo de la cabeza”.