IX-Verdes defende la xestión pública del Niemeyer.
- 14
- oct
- 2011
El grupu parlamentariu d’IX Verdes na Xunta Xeneral solo llogró los votos del Partíu Popular na defensa de la continuidá del Centru Niemeyer con una xestión publica. Sicasí, esti partíu tamién votó la Proposición Non de Llei del Partíu Socialista que s’estremaba de la d’IX Verdes en que pidía, ensin condiciones, “la cesión del equipamientu y edificios del centru Cultural a la Fundación del mesmu nome, pa que ésta pueda cuntar cola cobertoria llegal necesaria pa garantizar l’actividá del centru de forma oportuna”.
La Proposición Non de Llei d’IX na Xunta refuga’l discutiniu surdíu alrodiu del Centru Cultural Internacional Oscar Niemeyer d’Avilés y reclama a los representantes culturales del Principáu d’Asturies más prudencia y espíritu de consensu a la d’encetar la necesaria participación de la Comunidá Autónoma del Principáu d’Asturies na xestión d’esti Centru.
De la mesma, desixía a toles entidaes concerníes cola xestión presente y futura del Centru Cultural Internacional Oscar Niemeyer un esfuerzu decidíu pa que, sobre la base del dialogu ente les instituciones, la máxima profesionalidá, eficiencia y tresparencia na xestión del Centru pueda garantizase’l so futuru. Nesi sentíu, y partiendo del calter públicu del órganu de xestión d’esi centru, encamienta al Gobiernu d’Asturies a que tome toles midíes necesaries pa que, nel ámbitu de les sos competencies, garantice l’actividá del Centru Cultural de manera normal y siguida.
