Menu

Cola escusa de los retayos propuestos pola Unión Europea, el Gobiernu de Mariano Rajoy punxo en marcha "una reforma fondamente ideolóxica".

L'alcaldesa de Castrilllón y candidata per Asturies d'IX al Parlamentu Européu sollertó güei en Granada de la perda de l'autonomía local que supon la reforma de l'Alministración local impulsada pol PP y que, aseguró, va en contra de la Carta Europea de l'Autonomía Local. La reforma, añedió ye una vía más p'afondar nel cambéu de modelu d'Estáu. Cola escusa de los retayos propuestos pola Unión Europea, el Gobiernu de Mariano Rajoy punxo en marcha, dixo, "una reforma fondamente ideolóxica" que resta autonomía municipal y que va provocar en munchos casos la desprotección de la ciudadanía".

El vaciáu de competencies municipales supon un nuevu ataque, enfatizó Vallina, al sistema de participación de la xente qu'arrinca xusto pola alministración más cercana. "Ye una estratexa pa dir laminando, adulces, la poca democracia que teníen y precisamente nel momentu en que los ciudadanos y ciudadanes esixen más cercanía y una acción más directa y participativa na política".

Al pie de la so compañera por Granada na llista europea, María Piedad  Castillo, l'actual rexidora de Castrillón defendió'l municipalismu como una de les estancies que meyor da respuesta a los problemes de los vecinos pos, dixo, ye quien meyor lo conoz, dada la so cercanía. Sicasí, la reforma supon un importante retrocesu pa l'afayadiza prestación de servicios. "Desaposiente de toles tos competencies y el problema agora ye quė va pasar. Ye bien complicao cuando tas gobernando y ves les necesidaes de la to xente pa dici-y a una señora que nun-y das una ayuda pa comer y qu'esperé, qu'hai que tener paciencia, porque la macroeconomía va perbién y los biltos verdes tán ende. Pos que venga'l señor Montoro a dici-y lo".

Pa Ángela Vallina ye imprescindible llantar cara a les polítiques de cambéu del modelu. Ye'l momentu, dixo, "de dicir basta y la primer oportunidá que tenemos, dientro de les poques armes que nos da esta democracia, que ye votar cada cuatro años, ye'l 25 de mayu. Empecemos perhí, a dicir non a esta política que namá trai sufrimientu a la ciudadanía".