Menu

Ángela Vallina y Ovidio Zapico treslladaron al responsable de Desenvolvimientu Rexonal pa España la esmolición polos incumplimientos de plazos

La Comisión Europea va tar sollerte a la xustificación per parte del Gobiernu español de les obres na Variante ferroviaria de Payares, cofinanciaes con fondos de la Unión. La eurodiputada asturiana Ángela Vallina y el diputáu autonómicu Ovidio Zapico axuntáronse esta mañana col responsable pa España, Italia y Polonia de la Dirección Xeneral de Desenvolvimientu Rexonal, Jan Mikolaj  Dzieciolowki, a quien treslladaron la esmolición polos repitíos retrasos nesta obra con cargu a fondos FEDER que conclúin pal próximu 31 de marzu pero que, sicasí, inda nun tien calendariu d'entrada en serviciu. Zapico enfatizó en qu'IX va esixir qu'Asturies cunte, "lo antes posible" con una conexón de la rede ferrial que supere la precariedá de los actuales túneles de Payares.

Na xunta, Vallina y Zapico pidieron información sobre posibles víes de financiamientu europees pa la meyora de la rede de cercaníes, anque esta alternativa paez, nestos momentos, pocu vidable salvu en casos concretos de conexones transeuropees de ferrocarril, pero non con fondos FEDER de cohesión , cuidando que Asturies dexó de ser rexón prioritaria.

Zapico esixó a la Conseyera d'Infraestructures, Belén Fernández, que ponga tolos medios tantu pa esixir baramentu na variante de payares como pa la busca de recursos de l'Alministración Central pa un proyectu integral de meyora de les cercaníes, aprovechando la rede de Renfe y de l'antigua Feve. Nesti sentíu, el parllamentariu repitió que la Conseyera, nesi documentu de "consensu" que ta trabayando pa emprestar ante l'Alministración Central  sía "concretu" y qu'incluya, de verdá les prioridaes d'Asturies y que nun se convierta nuna carta a los reis magos"