Menu

L'Arquivu Históricu d'Asturies acueye, dende güei, la esposición de Neños de la Guerra, con documentos como'l del espediente orixinal de Pablo Miaja, el maestru qu'acompañó a menores dende El Musel hasta la URSS

El coordinador xeneral d'IX Asturies, Ramón Argüelles, reivindicó güei, la obligación ético y moral d'España y d'Europa para colos refuxaos que lleguen hasta les fronteres de la unión, fuxendo de la guerra. Argüelles, participó ayeri na apertura de la esposición que, nel Archivu Históricu d'Asturies, va ufiertar al públicu un relatu d'una hestoria dramática pero qu'inda sigue viva.

El momentu, destacó'l líder d'IX, ye l'oportunu: “non solo polos 80 años sinón porque, desgraciadamente, l'actualidá ta cutiéndonos día ente día con temes similares a estos, lo qu'asocede que les relaciones son bien distintes. Gustaríame empezar dando les gracies a aquellos países qu'ante circunstancies adverses obraron de forma distinta a lo que tamos faciendo agora, de forma egoísta; tendieron la mano a unos neños que nun teníen, probablemente, nin futuru, nin porvenir, nin educación. Tendiéron-yos la mano, recoyéronlos, educáronlos, enseñáronlos y, por tanto, tánnos dando una llección, anguaño, cuando tamos preguntando qué cupió de xente podemos recibir, ¿10, 15? Cómo si fuera un númberu, como si tuviéramos falando de ganáu”.

La protagonista de la presentación foi Araceli Ruiz Toribios, presidenta de l'Asociación Asturiana de Neños y Neñes de la Guerra y una d'eses neñes qu'hai yá 80 años tuvieron que salir, nuna nueche de mieu y llárimes, nun barcu dende El Musel con destín a la URSS.

Argüelles esplicó emocionáu que, al llegar a la esposición, al saber qu'él yera'l coordinador d'IX, Araceli retrucara qu'ella yera d'IX. “Non, Araceli, Izquierda Xunida somos tu, o queremos ser tos”. Y la emoción nun yera para menos col relatu d'esta nonaxenaria vital y con una capacidá de comunicación al altor de les esperiencies vivíes, con una llarga trayectoria personal y llaboral na URRSS, onde se xubiló en 1980. Una hestoria con lluces y solombres, con murnies y ausencies, pero tamién cola esperanza d'un regresu que, nos 60 y los 70, intentó ensin ésitu, poles torgues españoles. “Dempués d'una vida vivida fora d'España quies más a España y quies más a los españoles. Volví en 1980 cuando me xubilé. El mio últimu trabayu foi en Moscú na radio”.

El so casu, como una profesional bien formada, nun ye estraordinariu. Ello ye qu'enfatizó Araceli Ruiz, el 50% de los neños y neñes que fueron acoyíos na antigua URRSS terminaron estudios universitarios superiores, l'otru 50% llograron formación profesional superior.

La presidenta de l'Asociación Asturiana de Neños y Neñes de la Guerra fixo un llamamientu a la población polo xeneral, especialmente a la más nueva, a visitar la esposición. “Lo que comentamos ye la nuesa vida, que ye la hestoria de la nuesa España”.

Una vida qu'arrincó, en ciertu mou, nuna difícil travesía que los alloñara de la guerra pero tamién de les sos families, amigos, y qu'Araceli recordó, al pie de les bombes y l'acorazáu Cervera, nel versu del so maríu yá fináu:

"Desde una quinta de Roces
llegaron aquí al Musel
mil niños clamando a voces
por su suerte de papel.
La noche, tétrica noche
agorera en su conciencia
colocó un macabro broche
dentro de una embarcación
crujieron mil corazones"

La directora del Archivu Históricu d'Asturies, Concepción Naves, definió la inauguración d'esta amuesa como un día "d'allegría” pola posibilidá d'homenaxear y recordar a unes persones que, dixo, tuvieron que dexar la so vida de mano otra llueñe. “Ellos nun lo escoyeron. Nun cometieron nengún delitu, nun taben escorríos pola xusticia. “Tuvieron la suerte o la desgracia de que los sos padres, a cencielles, fueron los vencíos”, resumió.. 

La responsable de la entidá quixo estimar a IX la elección del Archivu pa esibir esta amuesa, de la que felicitó a l'Asociación Asturiana de Neños de la Guerra y al Archivu Históricu Nacional de Cataluña pola organización de la esposición, na que tamién van poder vese pervalibles documentos del propiu Archivu Históricu d'Asturies, que contribúi con dellos documentos propios, ente ellos l'espediente orixinal de Pablo Miaja, el maestru qu'acompañó a los neños que salieron dende El Musel escontra URSS, y tamién de los primeres repatriaos.

La vocera d'IX nel Conceyu d'Uviéu, Cristina Pontón, recordó que l'acoyida de neños y neñes asturianes expatriaos tamién se produxera en Francia, Bélxica Reinu Xuníu y, de forma especial, na URSS  que ye la que queda recoyida na esposición. N'imaxes y testos, el visitante va poder esbillar, en palabres de Pontón, “la desgarradora hestoria de lo que supon una guerra, pero al empar, coles mesmes, la entrañable solidaridá, y necesaria, tamién, ente los pueblos”.

Como yá fixera'l coordinador xeneral, Ramón Argüelles, contrapuso esa solidaridá al zarru de fronteres actual. “Avergóñanos ver como les autoridaes europees tán encetando esta situación”. Frente a ello, tenemos de ser un país, reivindicó la conceyala, “un continente solidario y atopadizo como otros dir colos nuesos neños y neñes de la guerra”.

El Viceconseyeru de Cultura y Deporte, Vicente Domínguez, aseguró que pa él la esposición yera más qu'una simple amuesa de nomes anónimos, gracies a la so relación con Josë Fernández Sánchez, de Ablaña, tamién conocíu como “Pepe'l Rusu”, y quien, na so mocedá, abrió-y los ojo ante la realidá d'aquellos neños y neñes que tuvieron que salir d'España pola guerra civil.

“Esta iniciativa, resaltó'l viceconseyeru, ye d'un valor estraordinariu y nun lo digo dende les palabres atentes que se tienen que dicir por cortesía sinón dende una reflexón fonda”.