Menu

Los dirixentes d'IX ficieron pública esta mañana una nueva propuesta para la negociación con Podemos qu'enceta la constitución d'una oficina de llucha contra la corrupción y rebaxa de los requisitos pala presentación per parte de los ciudadanos d'Iniciatives Lexislatives Populares (ILP).

Esti nuevu pasu dáu por IX dientro d'un intercambiu de propuestes y evaluación cola formación morada asocede al documentu basáu na creación d'una Llei de Derechos Sociales Básicos. L'oxetivu d'estes propuestes supon, según el coordinador d'IX, sumar nueve más cinco, 14 diputaos, los mesmos que'l PSOE y forzar les sos posiciones, crear, según Llamazares “un polu d'izquierdes”.

IX amosóse dispuesta a axustar la creación d'una oficina anticorrupción tantu a partir de la propuesta propia, como de la de Podemos –bloquiada nestos momentos nel parlamentu- o al traviés de cambeos de la Llei de Tresparencia . L'acercamientu significa poner en marcha la oficina, dependiente de la JGPA, que se dedique a la prevención y recoyida de denuncies en materia corrupción y que contemple la posibilidá de la denuncia anónima. IX modifica la so posición yá que duldaba de la denuncia anónima y la so llegalidá y considera que yá hai marcu para esa denuncia anónima que puede ser el de la OLAF, na Unión Europea, o la de l'Axencia Tributaria nel nuesu país.

Tocantes a la Iniciativa lexislativa popular, dempués de que la Xunta refugara la propuesta de Podemos colos votos a favor d'IX, la nueva redacción amenorga'l volume de firmes riquíes para la presentación de la mesma de 10.000 a 5.000, aumenta'l plazu de trés a seis meses para la recoyida de firmes y supon dar sofitu a el promotores, colos servicios de la cámara y que puedan defender la so iniciativa na comisión correspondiente del Parlamentu. Significa avanzar en democracia participativa dientro de les llendes de la Constitución, esplicó Llamazares.

En dambes materies puede sentase una pilastra democrática, de rexeneración democráticoa para lo que queda en llexislatura, esplicó Llamazares. “Nun sería una llexislatura perdida nin en materia social nin en materia de llucha contra la corrupción si ponemos d'alcuerdu”, concretó. A xuiciu de Llamazares estes materies podríen tener más sofitos que los d'IX y Podemos y convertise en lleis.