Ramón Argüelles, Concha Masa y les secretaries de Política Municipal y Movimientos Sociales axuntáronse güei col rector, Santiago García-Granda
Izquierda Xunida treslladó güei al rector de la Universidá d'Uviéu, Santiago García-Granda, una propuesta pa fortalecer la entidá, cola so participación en proyectos públicos d'investigación, desenvolvimientu ya innovación, aprovechando'l nuevu escenariu que s'abre tres l'abandonu definitivu de la incineradora como modelu de xestión de les borrafes d'Asturies.
El coordinador xeneral d'IX, Ramón Argüelles, que s'axuntó güei col máximu responsable de la institución académica, reivindicó'l papel central que tien que tener la Universidá como un elementu básicu pal desenvolvimientu d'Asturies. “Tamos esmolecíos pol desenvolvimientu de la Universidá y queremos incorporar nel nuesu programa pales próximes elecciones iniciatives que sían bones pala universidá porque van ser bones p'Asturies”.
Al respective de la investigación pa valorizar el combustible sólidu recuperáu nel procesu de xestión de les basures, Argüelles esplicó que se trataría de qu'esti productu, en cuenta de quemase como plantega'l Gobiernu, tresformarase por aciu un procesu químicu en metanol. “Pa eso precisamos técnicos de calidá, que seguro que los va a haber na Universidá d'Uviéu; un equipu de trabayu que desenvuelva eses iniciatives y precisamos tamién el concursu d'una empresa motora nesto: tamién pensamos n'Hunosa, cola que vamos falar”.
L'oxetivu, a xuiciu d'Argüelles, ye llograr un productu de valor añedíu daqué que, dixo, va contribuyir a xenerar “vida” nel ciclu económicu faciendo amás a “Asturies, a la Universidá y a Hunosa un referente na eliminación de borrafes”.
Na xunta, a la que tamién asistieron les secretaries de Política Municipal y Movimientos Sociales,Gabriela Álvarez y Mayka Barros, y la diputada Concha Masa, tamién s'encetaron les necesidaes de financiamientu de la Universidá d'Uviéu, según la disposición d'IX a sofitar l'ampliación de la ufierta educativa pública.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies