Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

12/09/2017

IX esixe diálogu a Clas y denuncia el peligru de desapaición del sector de la lleche poles desllocalizaciones

Argüelles anuncia que la formación va primir por que se puea abrir el diálogu empresa-comité y alvierte que va refugar les desllocalizaciones

María José Miranda sollerta de que'l treslláu de producción a Galicia va tener consecuencies letales pal sector lácteo asturianu

El voceru d'IX en Siero reclama al Conceyu que medie nel conflictu

El coordinador xeneral d'IX, Ramón Argüelles, nomó güei de “inaceptable” la falta de diálogu de Central Llechera Asturiana que, al so xuiciu, ye l'orixe que sacó a la cai a la plantiya de la factoría de CAPSA en Siero. Los problemes ensin dialogar nun se solucionen, aprofió Argüelles que denunció cómo se tán treslladando a otros centros de producción línea d'actividá, “como la llínea ensin lactosa, que se llevó a Llugo. Ello ye que ta operando en Llugo con más de 1,2 millones de botelles de lleche a la selmana. Esto ye bien esmolecedor porque esto ye estazar la empresa y, sobremanera, sacala d'Asturies, onde esta empresa nació y onde tien la so implantación y onde tien d'espandise”.

El líder d'IX, que s'axuntó con miembros del comité d'empresa, mientres la concentración frente a la Plaza del Mercáu de Pola de Siero, esplicó que dende la formación “vamos exercer tola presión posible, primero por que la empresa sentarase a axustar y, dempués, por que esti procesu de desllocalización nun se caltenga”.

Dende'l grupu parlamentariu, la diputada y vicepresidenta primer de la Xunta Xeneral del Principáu, María José Miranda, amosó'l máximu sofitu a la plantiya de CAPSA y enfatizó la necesidá de que les instituciones asturianes asuman la so responsabilidá para lluchar contra la deslocalización d'una industria tan importante. “Ye sospechosu cuando Astals (Pedro) presidía CAPSA aumentaren les empreses catalanes y, agora, con Tellado, aumenten les empreses gallegues y ye una amuesa clara de deslocalización y de faer inversiones na Comunidá Autónoma d'ónde son los sos presidentes y non n'Asturies, onde ye la seña de Central Llechera Asturiana”.

María José Miranda sollertó, amás, de los riesgos d'una desllocalización pos, al so xuiciu, va tener unes consecuencies letales para'l campu asturiano: “va ser el fin de les ganaderíes de lleche d'Asturies, porque nun van ser competitives treslladando la lleche a la comunidá autónoma de Galicia”.

Pela so parte, el voceru d'IX en Siero, Edgar Cosío, reclamó que l'alministración implíquese para buscar alternatives. “Venimos esixendo dende l'entamu del conflictu llaboral que'l conceyu exerza de mediador ente la empresa y los trabayadores. Tenemos que recordar que se trata de la principal empresa privada que tenemos nel conceyu, una fonte bien importante d'emplegu pa la población de Siero y nun entendemos por qué, dende l'equipu de Gobiernu ta dexándose pasar y nun hai nengún tipu d'actividá en redol a esti conflictu nin de mediación, más cuando'l mesmu alcalde ye trabayador en excedencia”.

Volver

Compartir

2014 Izquierda Xunida d'Asturies - Política de privacidad - Política de cookies