Menu

Reclama un alcuerdu parlamentariu p'afitar la posición y la busca d'aliances con otres comunidaes

Gaspar Llamazares, voceru parlamentariu d'IX na Xunta Xeneral, pidió esta mañana al executivu asturianu qu'esclarie la so posición sobro la negociación del financiamientu autonómicu, yá que hasta'l momentu l'informe de los técnicos “globalmente ye negativu” p'Asturies y tarrez que lo que mal empiece mal acabe. El voceru d'IX, que dixo tar perplexu, demandó un alcuerdu parlamentariu p'afitar la posición d'Asturies, que'l gobiernu asturianu busque l'alcuerdu coles comunidaes que salen perxudicaes por esti modelu y defina la so posición al respective d'una comisión, denominada d'espertos, qu'a xuiciu de Llamazares “nun ye tan d'espertos”.

Llamazares alvirtió qu'ente los pies forzaos que significa esti informe de la comisión técnica, qu'antecede a la negociación política, figura'l principiu de ordinalidá, -si una comunidá recalda más percápita va poder gastar más y, otra manera, al aviesu- y va beneficiar, por tanto, a les grandes comunidaes; tamién va repercutir la supresión del statu quo pa les comunidaes autónomes. Dambes cuestiones sumaes suponen un perxuiciu p'Asturies. Recordó que'l modelu simuláu que plantega FEDEA (Fundación d'Estudios d'Economía Aplicada) con estes premises supon la perda de 130 millones d'euros a lo llargo de cinco años.

Llamazares esplicó qu'Asturies allegó al financiamientu autonómicu coles mires de financiar globalmente los servicios públicos esenciales y vuelve nesti primer pasu, el técnicu, -que condiciona a los políticos- cola perspectiva d'empiorar.

Nesi primer pasu falar d'un pactu d'estáu sobro qué estáu podemos financiar, dixo Llamazares de la que sorrayaba que con esta premisa entra la estabilidá presupuestaria. “Si esi ye'l planteamientu nun tenemos nada que faer, porque les comunidaes vamos tender que partinos xuna financiamientu yá estable y nun vamos llograr un meyor financiamientu de los servicios públicos.”, dixo nel parlamentu asturianu.

El voceru d'IX tamién incidió en que la composición territorial d'una comisión d'espertos condiciona l'alderique, porque beneficia a les comunidaes mayores y perxudica a los menores.

Llamazares pidió a la Conseyera de Facienda qu'esplique la so posición y considera “inesplicable” que si Asturies nun ta acordies col informe nun hubiera un votu particular, cuando sí lu hubo per parte d'otres comunidaes autónomes y hasta del espertu designáu pol Gobiernu central.

Pela so parte, la Conseyera de Facienda, Dolores Carcedo, caltuvo que los informes mentaos pol voceru d'IX son un trabayu d'espertos, d'especialistes na materia, que se suponen independientes, y que'l Gobiernu asturianu nun punxo enriba de la mesa nenguna propuesta porque nun ye'l momentu de los gobiernos autonómicos. Carcedo va convocar a finales de mes a los grupos parlamentarios pa llograr “una única voz”, qu'integre tamién a los axentes sociales.

Carcedo aseguró que'l Gobiernu asturianu va refugar que na futura negociación del financiamientu autonómicu contémplese la posibilidá d'esaniciar el principiu de 'status quo' aplicáu hasta agora y que torgaba que'l nuevu modelu a aplicar supunxera perder fondos pa nenguna comunidá al respective de los que venía percibiendo.

Amás, el Principáu, dixo, va refugar l'aplicación del denomináu sistema de ordinalidad. La Conseyera aseguró na Xunta que va defender la inclusión nel futuru sistema de nueves variables pa determinar el costu de la prestación de los servicios o una mayor desagregación por grupos d'edá pola medría del costu sanitariu que xenera l'avieyamientu poblacional baxu la premisa de que los servicios empréstense nes mesmes condiciones en toles comunidaes.