Menu

IX Asturies va esquizar alternatives p’ameyorar la situación del sector de producción de la mazana de sidra, que nestos momentos traviesa problemes de comercialización y cuerre el riesgu de perdese nes pumaraes.

Trátase, según esplicó'l coordinador xeneral de la formación, Ramón Argüelles, de buscar alternatives que dexen "regularizar" les colleches, evitando los altibaxos actuales, onde munchos de los pomares carguen añu sí y añu non.

El máximu responsable d’IX Asturies axuntóse güei en Bimenes con representantes de la formación nos distintos conceyos que formen parte de la Cuenca de la Sidra pa tratar d'atopar víes para rellanzar un sector que tien de ser clave nel desenvolvimientu del campu ástur y de la marca "Asturies".

Amás de les acciones para fomentar plantíos d'árboles ensin afectar pol "vecéu" Argüelles apostó por incentivar tamién campañes qu'impulsen un mayor consumu de la sidra asturiano con denominación d'orixe y que dexe la trazabilidá del productu dende la pumarada al vasu.

"Si lo que faemos ye poner en valor lo que significa la sidra asturiano p’Asturies la xente va consumir sidra asturiano, qu'a la fin ye lo que nos obliga un mercáu capitalista: que s'escueya un productu, pola calidá, porque va xenerar puestos de trabayu na mesma tierra".

Pala coordinadora d'IX en Villaviciosa y productora de mazana, Carmen Pedrayes, ye imprescindible poner víes pa evitar que la mazana quede tirada nes pumaraes. "Tamos presumiendo de que ye la meyor sidra, Asturies, la mazana, Asturies Paraísu Natural, cuando realmente nun-y damos valor a lo que tenemos". Y ye que, esplicó, ta refalgándose la mazana autóctona en favor de la importada.

Pela so parte, la vocera d'IX en Bimenes, Alazne Ceñal, aprofió la importancia d'esti alcuentru que va dexar, agora, percanciar información sobro midíes que dexen ameyorar les esplotaciones, evitando, siquier nos nuevos plantíos, la irregularidá na producción.

Y ye que, Bimenes ye unu de los conceyos más afectaos polos problemes del sector, con parte de la collecha entá nes pumaraes y con riesgu de perdese. "En Bimenes, en concretu, afecta porque, mayormente, son productores de mazana pequenos, nun hai grandes producciones y lo que se vio ye que nun pudieron acabar vendiendo esa mazana".