Menu

Gaspar Llamazares considera que se trata d'un grave problema de salú pública que caltién paralizaes un 10% de les cames del HUCA

La Xunta Xeneral encamienta al Gobiernu a poner en marcha midíes para amenorgar les resistencies a antibióticos n'Asturies. Esta iniciativa d'IX foi sofitada por unanimidá de tolos grupos parlamentarios. A xuiciu de Gaspar Llamazares, voceru parlamentariu d'IX na Xunta Xeneral, tratase d'un grave problema de salú pública, cuidando que les resistencies a los antibióticos crecen de manera xeométrica en tol mundu nos últimos tiempos. N'España nel últimu añu produciéronse 2.500 fallecimientos de resultes a les resistencies a antibióticos, 25.000 n'Europa y 700.000 nel mundu. Esta ye la magnitú d'un problema, que de nun faese daqué llueu va acabar convirtiéndose nel añu 2050 na primer causa de muerte prematura. N'Asturies, un 10% de les 900 cames del Hospital Universitariu Central d'Asturies, sorrayó Llamazares, 90, tán paralizaes por infección noxocomiales, y delles 45 son por infección multiresistentes.

Llamazares reconoció la esistencia de midíes para frenar les resistencies, pero tamién esplicó que magar qu'España foi unu de los primeros países n'incorporase al plan para amenorgales, nun tuvo abonda dotación económica para encetar el problema.

La Proposición Non de Llei d'IX aprobada inclúi los siguientes cinco puntos: encamienta al Conseyu de Gobiernu a dar máxima prioridá nel SESPA tantu a l'aplicación del Plan Nacional p’amenorgar les resistencies a los antibióticos como al Programa de Optimización del usu de los antibióticos (PROA), garantizando una dotación presupuestaria abonda; a rematar con urxencia la ellaboración de la guía de prevención de resistencies antibiótiques del conxuntu del SESPA, según del sistema y protocolu de vixilancia y control de la mesma; tamién a poner en marcha comisiones técniques de optimización de los antibióticos y de prevención de les resistencies tantu nel SESPA como en cada área sanitaria, incluyendo'l nomamientu d'un comisionáu. Nos dos últimos puntos la Xunta Xeneral pide promover la erradicación del accesu a antibióticos ensin receta mélica según a inducir el bon usu de la antibioterapia nes polítiques y planes de salú pública, según a favorecer nel marcu del Estáu la investigación en patóxenos resistentes y nuevos antibióticos.