Menu

Concha Masa esplica que tamién demanda la presencia de l'Academia de la Llingua

El grupu parlamentariu d'IX rexistró dos enmiendes al Proyectu de Llei del Principáu d'Asturies de primera cambéu de la Llei 9/1996 de 27 d'avientu, reguladora del Conseyu Escolar del Principáu d'Asturies p’ameyorar la participación directa de colectivos que, a xuiciu de la diputada Concha Masa, tienen de tar representaos nel máximu órganu consultivu y de participación social de la programación xeneral de la enseñanza nos niveles non universitarios.

El testu indica la entrada de trés persones en representación de sectores afectaos por polítiques sociales prioritaries: igualdá, mocedá y discapacidá. IX propón un nuevu testu por qu’estes persones sían nomaes a propuesta de los órganos de participación y asesoramientu en materia d'igualdá y mocedá, y de la organización más representativa de les persones con diversidá funcional nel ámbitu de la nuesa comunidá autónoma, en cuenta de facelo directamente per parte del Gobiernu. Cola enmienda d'IX van ser les organizaciones representatives quien lo faiga. “Pensamos que ye más democrático y participativo que sían escoyíos polos colectivos sociales que tienen la so participación en Conseyos como'l de la Mocedá, el de la Muyer o n'asociaciones de persones con diversidá funcional”, argumenta Masa.

La segunda enmienda refierse a la entrada de l'Academia de la Llingua nel Conseyu Escolar. El testu del Gobiernu figura yá la entrada de seis persones de reconocíu prestíu espertes nel campu de la educación, nos ámbitos de la renovación pedagóxica, de la investigación y l'innovación, de l'Alministración educativa o n'aspeutos socioculturales del contestu educativu asturianu. Ye nesti contestu onde IX xulga relevante la presencia d'una persona designada pola Academia de la Llingua. “Creemos que ye importante que l'Academia tenga representación nos órganos referentes a educación, que pueden presentar suxerencies o propuestes sobro la implantación del asturianu na educación”, esplica la diputada.