Menu

Concha Masa, diputada d'IX na Xunta Xeneral, amosó güei la so esmolición al Conseyeru d'Educación pol nuevu retrasu que va sufrir el segundu IES de La Corredoria, confirmáu esta mañana por Genaro Alonso en see parlamentaria.

Masa demandó, una vegada más, axilidá al Principáu y alvirtió de los problemes que puede tener el barriu énte la saturación del Institutu actual, que tamién da serviciu a los alumnos de Cualloto. La diputada d'IX esixó a Educación y al so Conseyeru un compromisu pa resolver de la forma más rápida posible l'últimu problema –la nulidá de los pliegos de contratación del proyectu denunciaos pol Colexu d'Arquiteutos- y por que, en casu de que l'institutu nun tea construyíu dientro de dos años, comprometer con una solución temporal lo más digna posible.

Masa recordó la "reconocida" necesidá de la nueva instalación educativa en La Corredoria y que se trata d'un institutu anunciáu yá en 2010 y que se prevía tuviera construyíu pal cursu 2015-2016. Nada d'eso asocedió y agora, dixo Masa, “nun sabemos si por un cúmulu casualidaes o pola torpeza n'axilización de los trámites vuelve tar paráu”, denunció nel Parlamentu.

Pela so parte, Alonso dixo que se trata d'un recursu imprevistu ya imprevisible” porque análogos pliegos d'otros dos institutos, el de La Florida y el de La Fresneda, nun fueron recurríos y sí los de La Corredoria. “Ye incomprensible pero real”, dixo'l Conseyeru d'Educación qu'anunció una xunta col Colexu d'Arquiteutos la selmana que vien. Aseguró que los trabayos de construcción nun se van empecipiar hasta l'últimu trimestre de 2019.

“La nuesa esmolición ye planiar l'atención educativa afayadiza del Carmen Ruiz Tilve el próximu añu y el siguiente”, respondió a la saturación cola que puede vese l'actual IES de La Corredoria, énte la incorporación de nuevos alumnos procedentes del mentáu centru.