Menu

El coordinador xeneral Ramón Argüelles reclama un “planteamientu global” de les polítiques d'Emplegu

Ovidio Zapico va apellar al conseyeru por qu'esplique cómo ye posible qu'el 55% de los fondos del plan nun vaigan executar se

Juan Ponte camienta que se produció un problema por falta d'orientación y planteamientu per parte del SEPEPA

Gabriela Álvarez reprocha que, una vegada más, cargase sobro los Conceyos la deficiente xestión del Principáu

Izquierda Xunida denunció güei el fracasu del plan “Actívate” empobináu a paraos de llarga duración y que, na convocatoria d'anguaño, dexó ensin axudicar más de la metá de los recursos conseñaos. El coordinador xeneral d'IX, Ramón Argüelles, reprochó la errática xestión del Serviciu Públicu d'Emplegu d'Asturies (SEPEPA) que refugó proyectos en 29 conceyos qu'apiguren alredor del 65% per cientu de la población en paru d'Asturies. La situación, enfatizó Árgüelles, ye entá más grave polos problemes na implementación de los planes d'emplegu, que tán dexando a munchos Conceyos nuna situación precaria, al esixir el Principáu la devolución de les subvenciones yá executaes. “Tenemos qu'esixir al Gobiernu un planteamientu global de les polítiques d'emplegu”, esixó'l máximu responsalbe de la formación coles mires de coordinar cola realidá económica. “Da la sensación, y eso comentase colos sindicatos, que non solo esisten estos problemes digamos más bien técnicos de tener que devolver ayudes por non cumplir dalgún requisitu, con problemes de programación”.

Les polítiques d'emplegu n'Asturies son un “estrueldosu fracasu”, según aseguró esti día’l diputáu Ovidio Zapico, que calificó al Gobiernu de Javier Fernández de “inmovilista y sufríu” nesta materia. A los problemes de los planes d'emplegu xúnense agora los del Actívate nuna nueva vuelta de tuerca que podría poner en riesgu del Fondu Social Européu, pola actitú del propiu executivu autonómicu. “Yo creo qu'esto ye daqué bien grave que se debe de correxir ensin muncha demoranza. Dende IX nun vamos aceptar la resignación porque entendemos que queda llexislatura abonda pa dar vuelta a la situación y pa plantegar alternatives”,

Polo pronto, IX va apellar el próximu xueves al conseyeru Isaac Pola por qu'esplique previsiones y planes inmediatos del Gobiernu na materia. Amás, va plantegáse-y que convoque una mesa de trabayu na que participen Principáu, Conceyos, Axentes Sociales y espertos. “De les conclusiones d'esa mesa de trabayu tien que salir materia abondo pa camudar, pa producise una alternativa na xestión d'estos programes y pa modificar tantu les bases como los procedimientos de les mesmes”.

La situación, a xuiciu del diputáu, ye responsabilidá de tola estructura, dende la directora del propiu SEPEPA hasta'l Conseyeru. Sía que non, añedió, el Gobiernu tien qu'esplicar qué pasó nel Actívate o por qué los Conceyos tienen que faer frente a sentencies millonaries polos planes d'emplegu local.

La secretaria de Política Municipal, Gabriela Álvarez, amosó la máxima esmolición énte los decepcionantes resultaos del Plan Actívate. “Yá ta bien que los paganinis sían, de primeres, los paraos”, señaló Álvarez quien recordó que los Conceyos escluyíos de la convocatoria suponen más d'un 65% del total de la población desemplegada d'Asturies. De la mesma, reprochó que se cargue a les alministraciones locales el pesu de los planes. “Equí tien que depurase dalguna responsabilidá y ta claro que nun pueden ser los Conceyos los que sufran esto, nin los paraos. Esto ye p'arrebolase y yo, si agora mesmu tuviera nel cargu de responsabilidá de directora del SEPEPA o Conseyeru, asustaríame un poco”.

No fondo del fracasu del Actívate, del que namá s'executará un 45 per cientu de los recursos conseñaos, frente al 88% del exerciciu anterior, ta, a xuiciu del secretariu d'acción política y conceyal en Mieres, Juan Ponte, la falta d'orientación y de planteamientu per parte del Serviciu Públicu d'Emplegu d'Asturies, na relación colos Conceyos. Y ye que p'aportar a esta llínea de fondos destinaos a paraos de llarga duración yera necesario presentar proyectos. Del total d'ellos (79), namái fueron tomaos en considerancia pal so financiamientu 30. “Hai más proyectos que se denieguen que los que s'aprueben. Creo que ye de sentíu común concluyir que'l problema nun va ser solo d'entidaes locales o Conceyos, sinón que tien que ver con un problema d'orientación y planteamientu”. Daqué que tamién vendría refrendáu en casos concretos como'l de Mieres, onde'l problema surde arriendes de una estrema de criteriu sobro la homologación d'una rampla.

“Si'l 55% d'esi dineru que taba previstu pal Actívate nesta convocatoria nun se va gastar porque se deniegan 49 proyectos, más proyectos que los que s'aprueben, que son 30, el problema ye un problema d'organización, non solo d'esta llínea subvencionable d'emplegu sinón de toles llínees polo xeneral per parte del Serviciu Públicu d'Emplegu”, concluyó Ponte.