La diputada d'IX cree intolerable que nun se sigan a raxatabla les lleis y encamientos del Conseyu Xeneral del Poder Xudicial
Concha Masa, diputada d'IX na Xunta Xeneral, acusó al Conseyeru de Presidencia y Participación Ciudadana de tar mal informáu al negar que nun tea garantizao que víctima de violencia de xéneru y agresor nun coincidan nel mesmu espaciu nos xulgaos asturianos. Pala diputada d'IX son múltiples los casos en que víctima y agresor coinciden nun espaciu pequenu, tantu en salíes y entraes de xulgaos, como pasiellos o na sala de vistes, incumpliendo la normativa europeo y español y los encamientos del Conseyu Xeneral del Poder Xudicial, como foi puesto de relieve pel Fiscal Cimeru d'Asturies na presentación de la so memoria añal énte'l Parlamentu y en numberosos artículos de prensa. Pa la diputada “ye intolerable” que n'Asturies nun se sigan a raxatabla los encamientos del Conseyu Xeneral del Poder Xudicial pa garantizar la indemnidá de la víctima.
La diputada alvirtió de que ye posible diseñar circuitos que torguen la comunicación visual ente víctima ya imputáu, ente qu'Asturies sigue faciéndose oyíos sordos a estes normes, inclusive nos xulgaos de violencia machista n'Uviéu y Xixón, y menos n'otres localidaes, en xulgaos mistos, penales o nes secciones de l'Audiencia. “Nengún ta pensáu pa caltener la identidá de les víctimes”, sorrayó.
Pela so parte, el Conseyeru de Presidencia, Guillermo Martínez aseguró qu'estes midíes de separación d'espacios tán realizándose nos xulgaos de nueva construcción y que nos llugares onde nun ye asina son los funcionarios y trabayadores xudiciales quien s'ocupen de que nun esista contactu visual ente víctima y agresor. Martínez anunció esta mañana qu'esti mes personal técnicu de Patrimoniu visitó la Sección Tercer de l'Audiencia pa estudiar les obres necesaries na sala de vistes por que víctimes de violencia de xéneru puedan entrar y salir ensin ver al so agresor.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies