Menu

La proposición Non de Llei d'IX foi aprobada por unanimidá

La Xunta Xeneral encamienta al Gobiernu a la incorporación na alministración pública y nel sector públicu autonómicu de la categoría profesional de Técnicu d'Integración Social como base calidable d'atención nos servicios públicos y en defensa d'una titulación específica que s'imparte n'Asturies dende hai más de 20 años. Na Proposición Non de Llei que presentó IX, sofitada por unanimidá pol restu de los grupos, tamién s'inclúi la incorporación nes distintes convocatories, concursos y subvenciones promovidas pola alministración pública y el so sector públicu pal desenvolvimientu de programes empobinaos directamente a la intervención social en materia d'emplegu, sanidá, educación y servicios sociales, les titulaciones necesaries pa ocupar los puestos que vaigan desenvolver les xeres que se promuevan nos mesmos. Esa titulación necesaria va ser asignada en función de les competencies que se vaigan a desenvolver y estes tán recoyíes nel marcu llegal vixente de cada titulación.

Asturies cunta dende l'añu 1995 cola titulación de Técnicu Cimeru n'Integración Social que ye impartíu en trés centros públicos: IES Río Trubia de Trubia Uviéu, IES Carreño Miranda d'Avilés y el IES de Roces, Xixón, disciplina na que se titularíen, según l'asociación APAIS, abargana de 1000 profesionales, recordó la diputada d'IX, Marta Pulgar, encargada de defender la Proposición Non de Llei d'IX.

Pulgar apuntó l'ampliu espectru de xeres que pueden llevar a cabu estos titulaos de Formación Profesional que, sicasí, vense empuestos a trabayar nel Tercer Sector o presentase a convocatories d'auxiliar educador nel sector públicu, places per debaxo de la so cualificación. Nun asocede asina n'otres comunidaes autónomes como País Vascu, Cataluña o Andalucía onde vieron reconocía la so categoría profesional. Trátase, tamién, d'incorporar a la negociación colectiva na alministración y el sector públicu esta categoría profesional porque si nun ta reconocíu nun pueden nin desenvolver les sos práctiques profesionales en centros públicos, sinón privaos.

La propuesta, dixo Pulgar, va mas allá de la salida profesional d'un colectivu, porque cuando se fala de servicios públicos hai que falar de la calidá de los servicios que va directamente rellacionada cola especialización. “Esi plus calidable dar la especialidá”, esplicó Pulgar.