Menu

Asturies xuégase enforma y nun puede siguir los dictaos de les empreses eléctriques nin socializar les sos perdes, alvirtió'l voceru d'IX

Gaspar Llamazares, voceru parlamentariu d'IX na Xunta Xeneral, esixó güei al Gobiernu asturianu que marque una posición clara sobro la transición enerxética n'Asturies, al pie de empresarios y sindicatos, y fora de la rexón al pie de otres comunidaes autónomes énte la decisión de la Ministra de Transición Ecolóxica, non opinión como dicía Javier Fernández la selmana pasada. Llamazares alvirtió de qu'Asturies xuégase enforma, según el sector industrial asturianu y español. “Nun podemos siguir los dictaos de les empreses del sector eléctricu nin aceptar que socialicen les sos perdes”, esplicó na so vez d'entrugues al Presidente. Al so xuiciu la moratoria nuclear yá supunxo 6.000 millones pa les eléctriques y agora podría dase una “moratoria carbonífera” a favor de los ciclos combinaos.
 
A xuiciu del voceru d'IX lo importante ye cuntar con una posición común política y social, cuntando col sector industrial que ve con gran esmolición la iniciativa del Gobiernu central. El voceru d'IX considera que la decisión unillateral ya irresponsable de la Ministra de Transición Ecolóxica d'encurtiar los plazos nun yera xuna opinión, sinón xuna decisión tomada en representación del Gobiernu y espresada énte la UE, hasta tal puntu que camudó a España de bandu con al respective de los países europeos, pasando de formar parte d'un grupu con Alemaña, Francia ya Inglaterra, que tienen carbón, a asitianos al pie de los países nórdicos que nun tienen carbón pero, como nel casu de Finlandia acaben d'anunciar dos centrales nucleares nueves, y en Suecia empiecen a plantegase derogar la llei de paralización de les nucleares. “L'alderique de la enerxía de respaldu abrióse, pero al nuesu xuiciu mal, porque'l Gobiernu español púnxonos nuna situación excéntrica que nun tien que ver colos precedentes y la realidá de la industria español”, esplicó Llamazares.
 
Llamazares sollertó de que puede esistir la tentación de considerar que tamos –en referencia al Gobiernu- nel bandu ecolóxicu frente al conservador, pero al so xuiciu esto nada tien de ver cola realidá. “Yá fiximos mal negociu cola moratoria nuclear, porque yá pagamos los españoles a les eléctriques 6.000 millones d'euros”, aseguró pa de siguío sorrayar que nestos momentos lo que quieren les eléctriques ye que-yos paguemos los ciclos combinaos, sustituyendo'l carbón polos ciclos. “Sería'l segundu gran fiascu del sector eléctricu, sofitáu polos gobiernos.”, dixo. Llamazares considera ésti un mal camín que nun tien de faese .
 
El voceru d'IX tamién denunció que como dicen n'Iberdrola los problemes de la lluz soluciónense a escures y eso ye lo que tán faciendo nestos momentos.
 
“Nun se trata d'un bandu más ecoloxista qu'otru sinón d'una política industrial p'Asturies y pa España, sinón de siguir pesllaos, primíos, pol sector de les eléctriques que marquen nesti país munches coses, por casu marquen la moratoria nuclear y la transición enerxética, el preciu de la enerxía, que nel sector industrial ye un 30% superior a los nuesos competidores y ente los consumidores ye'l tercer mayor preciu de toa Europa”, indicó. Al so xuiciu hai razones abondes pa defender una verdadera transición que dexe al país cumplir colos oxetivos de París, dende un sector industrial competitivu y con unos ciudadanos que tengan unos costos industriales asumibles, frente a la transición express, la descarbonización express, y la muerte súbita del carbón.
 
Pela so parte, Javier Fernández defendió tamién una posición común n'Asturies y abogó por una discriminación per países pa salvar les térmiques de carbón. Al so xuiciu l'oxetivu de la Unión Europea ye qu'en 2030 la enerxía procedente de fontes anovables sía'l 32% en tola Unión pero podría estremase per países, según Fernández, yá que non toos parten de la mesma situación.