Menu

Cargos orgánicos ya institucionales d'IX sumense a la primer concentración y yá se convocó otra pal llunes frente a les instalaciones de la fábrica

L'anunciu de zarru foi un mazazu non yá pa la plantiya de la empresa sinón pa toa Asturies. Los y les trabayadores de la entidá, al pie de les organizaciones sindicales, tienen iguáu yá un calendariu de movilizaciones qu'arrincaron güei mesmu, con una concentración a les puertes de la aluminera.

Cargos orgánicos ya institucionales d'Izquierda Xunida d'Asturies y de los conceyos afectaos sumáronse a la primera de les cites, allegando a la concentración entamada a les puertes de la empresa y en solidaridá cola plantiya. Pal próximu llunes 22, tamién se convocó otra concentración dende les 14 a les 17 hores.

Nel día de güei, sumaronse a les movilizaciones, ente otros, l'Alcaldesa de Castrillón, Yasmina Tirguero, la secretaria de Política Municipal d'IX, Gabriela Álvarez, y les portavoce d'IX n'Avilés y gozón, Pilar Suárez y Llarina González, amás de los conceyales d'esos mesmos conceyos Carmen Conde y Isaac Frande.

Sol lema "ALCOA nun se cierra", preténdese una movilización masiva pa llograr revertir l'anunciu de zarru. Ello ye qu'al pie de esta primer concentración, ayeri yá s'aprobaba na Xunta Xeneral del Principáu una declaración institucional contra'l fin de l'actividá de la compañía que llogró'l sofitu unánime de tol Parlamentu asturianu. Güei, les Corporaciones d'Avilés y Gozón aprobaben tampien por unanimidá les sos propies declaraciones contra'l la clausura de la aluminera.