Menu

Ángela Vallina va moderar mañana en Nicosia (Chipre) una mesa redonda na que se va falar de la situación d'Oriente Mediu dempués del ISIS.

La eurodiputada, xuntu a representantes de partíos comunistes d'Iraq y Siria, Raid Fahmi y Nizar Trabulsi, y el diputáu curdu del Partíu Democráticu de los Pueblos (HDP), Hisyar Özsay, va tratar d'aventurar el futuru d'una de les rexones mundiales en más afectaes pola acción del tamién conocíu como DAESH.

El GUE empecipió precisamente güei martes unes xornaes p'analizar en fondura los retos políticos, sociales y económicos, d'Oriente Mediu arrincando, amás, con un alderique sobro'l Problema chipriota", un estáu miembru de la Unión Europea, asitiáu nuna isla partida en dos, tres una intervención turca en 1974, división que continua, inclusive físicamente, hasta los nuesos díes.

Nesti coloquiu participaron l'eurodiputáu Dimitris Papadimoulis y el secretariu xeneral del Partíu Progresista del Pueblu Obreru, Andros Kyprianou.

Nesta xunta del Eurogrupo de la Izquierda Unitaria Europea encetáronse tamién cuestiones rellacionaes col emplegu y, tamién, col paru, tantu na rexón como nel contestu européu y mundial.

Na axenda de los diputaos taba tamién bien presente lo que paez un fortalecimientu de los partíos y grupos d'estrema derecha n'Europa, más tres la irrupción nun parlamentu autonómicu español d'una fuerza que vendría responder a posiciones xenófobes, ultranacionalistes, machistes y homófobes que vendríen cuestionar el modelu de derechos reconocíu na mayoría de les constituciones europees y de la mesma Unión.

Pa mañana miércoles, ta previsto tratar la xeoestratexa y militarización n'Oriente Mediu y, amás, va analizase de forma específica'l conflictu palestín.