Menu

La organización reprocha la supeditación d'España a la política de Donald Trump y pide para Pedro Sánchez el so propiu “NON A LA GUERRA”

A la conseña de Venezuela deféndese, Asturies refugó güei n'Uviéu l'intentu de golpe d'estáu que se ta perpetando contra'l país caribeñu, dempués de que Juan Guaidó se autoproclamase presidente col respaldu de Washington. IU Asturies, en boca de los sos secretarios de Solidaridá Internacional y Acción Política, Roberto Ruiz y Juan Ponte, esixó nuevamente a Pedro Sánchez que respete “el derechu internacional asitiando a España cola mayoría de los países la comunidá internacional que caltienen la so reconocencia al Gobiernu de Nicolás Maduru como'l gobiernu lexítimu, llegal, democráticu de Venezuela“.

Ruiz denunció que'l golpe d'estáu de Guaidó nun cunta solo col respaldu d'Estaos Xuníos sinón tamién col so financiamientu. El Secretariu de Solidaridá d'IX Asturies llamentó que güei Pedro Sánchez, “de manera vergoñosa“, sumara a España a esa operación de la Casa Blanca no que, al so xuiciu, supon “l'arrenunciu a una política internacional propia, la entrega absoluta de la nuesa soberanía, poniendo a la nación española a los pies de los intereses del imperialismu, polo cual Pedro Sánchez y el so gobiernu van ser igualmente cómplices de lo que pueda pasar n'una nación soberana, como ye Venezuela, dempués d'asitiar a España fora de la llegalidá internacional, como yá fixera Aznar nel so día cola tarrecible semeya de les Azores que paez que Pedro Sánchez quier tamién para sí”.

Espíritu de les Azores. Les claves del golpe

Juan Ponte, esplicó qu'esti plan desestabilizador perpetase col sofitu del gobiernu de “estrema derecha de Donald Trump”. La reacción d'España y d'otros países europeos ta suponiendo, de facto, alicar l'espíritu de los Azores”, reprochó ponte en clara referencia a l'alianza que nel so momentu cerraron los expresidentes José María Aznar, n'España, Tony Blair, en Gran Bretaña, George Bush, n'Estaos Xuníos. “Supon la inxerencia nun país soberanu, violando a les clares el derechu internacional”, denunció'l secretariu d'Acción Política.

Para Ponte hai trés elementos clave qu'ayuden a entender que'l pais ta nestos momentos n'una situación de golpe d'Estáu nel que la autoproclamación de Guaidó ye, en realidá, el primer pasu, “n'una plaza, ensin pasar por nengún procesu electoral de votación, nengún mecanismu de deliberación nin de refrendo en nenguna urna”.

De segundes, añedió'l secretariu d'Acción Política d'IX, media hora foi abonda por que Trump reconociera al autoproclamado presidente, siguiendo dempués los sos pasos los gobiernos títeres “y llacayos del imperiu“ de Macri, n'Arxentina, y Bolsonaro en Brasil.

A estos dos elementos, Ponte suma la designación per parte d'EEXX de Elliott Abrams, “l'home que ta tres los golpes d'estáu de Nicaragua y el Salvador” coles mires de que llogre los recursos económicos necesarios por que Guaidó actúe como mandatariu interín de Venezuela.

Éstos trés elementos, añedió Juan Ponte, “demuestren, a les clares, que tamos énte otru golpe d'estáu lleváu a cabu polos Estaos Xuníos”.

Pa IX, la posición del gobiernu de Pedro Sánchez supón replegase frente a les polítiques imperialistes de la Casa Blanca. “Denunciamos amás que'l Gobiernu d'España baxe los pantalones y venza nuevamente énte les presiones de l'alministración Trump, presiones reconocíes pol ministru d'Esteriores, Josep Borrell estos díes”.

Asina, l'alliniadura del gobiernu de Pedro Sánchez coles posiciones de Washington supón poner baillar a España “al son de los tambores de guerra que de nuevu afina y toca EEXX”.

Sía que non, Juan Ponte reclamó'l diálogu como única alternativa pa buscar una salida a l'actual crisis política de Venezuela y esixó al Gobiernu d'España qu'abandone'l siguidismu” a les polítiques inxerencia d'Estaos Xuníos. “Non podemos retrotrayer a la bochornosa situación de 2002”, enfatizó el secretariu d'Acción Política, cuando “Aznar reconocía'l golpista Pedro Carmona contra'l comandante Chávez, golpe que fracasó gracies a la movilización popular. Por tanto, repitimos nuevamente'l sofitu al diálogu entamáu per México, Uruguai, poles Naciones Xuníes y por tolos países que nestos momentos tán aguiyando xuna solución pacífica al conflictu, al empar qu'espresen el so sofitu al pueblu venezolanu, al so gobiernu y al so presidente“.

Nesta situación, Rober Ruiz, en representación d'Izquierda Xunida na plataforma “Asturies contra'l golpe, Venezuela deféndese“ fixo un llamamientu a la movilización de tola sociedá asturiana pa forzar el cambéu na política del gobiernu d'España na cuestión, de forma que'l gobiernu de Pedro Sánchez tenga'l so “propiu NON A LA GUERRA como Aznar tuvo nel so día”