Menu

La Proposición Non de Llei d'IX y Podemos cuntó col respaldu de tolos grupos parlamentarios

La Xunta Xeneral del Principáu aprobó esta mañana una iniciativa d'IX y Podemos na que demanda al Gobiernu d'España qu'apruebe les normes necesaries sobro'l procedimientu xeneral d'aprobación de coeficientes reductores de la edá de xubilación pa trabayadores afectaos por turnicidá y/o nocturnidá y encamienta al Principáu a que, al traviés del Institutu Asturianu de Prevención de Riesgos llaborales, en collaboración colos diversos axentes sociales y en coordinación cola Conseyería de Sanidá, ellabore un estudiu sobro les consecuencies pa la salú física y psicosocial qu'afecta a los y les trabayadores suxetos a réxime de turnicidá y/o nocturnidá nel ámbitu del sector públicu autonómicu, valorando'l so impactu de xéneru. Trátase, dixo Pulgar na so defensa de la Proposición Non de Llei, de “ser más xustu colos y coles trabayadores y coles condiciones de protección a la fin de la so vida llaboral”. La Proposición Non de Llei foi sofitada por unanimidá de tolos grupos de la cámara.

Marta Pulgar, diputada d'IX, recordó qu'esta ye una iniciativa a propuesta de trabayadores que plantegen una problemática qu'afecta de forma social y política, nel nuesu país y na Unión Europea. La turnicidá y los equipos rotativos afecten a un númberu importante de trabayadores, por casu a los de la industria, bien masculinizada, pero tamién a los sectores de los cuidos y el sanitariu, que ye femenín y tien un enorme impactu, dixo la diputada d'IX. La mesma Comisión Europea alenta del impactu na salú'l trabayar a veces, especialmente la nocturnidá y les veces rotatories que pueden manifestase n'irritabilidá, trestornos del suañu… qu'afecten a persones y families. Tamién, incidió Pulgar, tien implicaciones pergraves al llargu plazu, n'afecciones al sistema oseo muscular, al neurolóxicu… qu'incide na so capacidá de trabayu, nel menor rendimientu y na so vida social.

La Organización Internacional del Trabayu reconoz, yá dende 1990, qu'a el trabayadores que mientres un númberu considerable d'años tuvieren emplegaos como trabayadores nocherniegos tendría de tenése-yos particularmente en cuenta polo que respecta a les posibilidaes de xubilación voluntaria antemanada o progresiva, cuando esistan baltes posibilidaes.