Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

22/05/2019

Anibal Vázquez aboga por crear naves nido o ampliar les instalaciones del institutu nel polígonu de la Cuadriella, en Turón

Ovidio Zapico dulda de la credibilidá de Barbón pa defender los intereses d'Asturies en Madrid

Anibal Vázquez, candidatu de Mieres pola Izquierda a l'alcaldía, propunxo esta mañana, al pie de Ovidio Zapico, dedicar les naves del polígonu de la Cuadriella, en Turón, a crear naves nido o ampliar les instalaciones del institutu de la localidá. L'alcalde, que visitó'l polígonu onde s'allugaba Diasa, recordó que Turón ye posiblemente ún de los territorios más castigaos de la reconversión minera.

Nel so momentu, dixo l'alcalde, había miles de puestos de trabayu y agora nun hai prácticamente nenguna actividá económica de caláu. “Paecía que col funcionamientu de Diasa, una empresa de fabricación de melecines tendría futuru, pero foi un auténticu fracasu y agora tenemos un polígonu que les sos naves tán en manos de los bancos”, esplicó'l candidatu acompañáu de los miembros de la candidatura local. Vázquez tamién esplicó que faló en munches ocasiones cola Conseyería para recuperar estes naves y poner naves nido por que vuelva l'actividá, que los empresarios tengan un cachu de nave col que realizar actividá y crear empléu. Agora, siguió, tán en manos de cinco bancos, ensin actividá, en fín, “un polígonu muertu de risa”. Otra de les posibilidaes según l'alcalde ye reutilizar delles naves p’ampliar la formación del Institutu de Turón, agora que se vuelve la vista a la formación profesional. “Taría al llau del institutu y sería una manera de completar la formación nel institutu”, esplicó.

Pela so parte, Ovidio Zapico, candidatu númberu dos d'Asturies pola Izquierda, alvirtió de qu'aquellos gobernantes que tienen la responsabilidá de dirixir el procesu de descarbonización tienen la obligación de llograr una transición enerxética ordenada y, sobremanera, xusta colos territorios. “La descarbonización nun puede dexar tres de sí pandoriales, polígonos industriales, pueblos ensin guah.es nin valles, como'l de Turón, ensin vida”, clamó l'actual diputáu. Coles mesmes, demandó “esixencia del futuru gobiernu d'Asturies” énte'l Gobiernu central. Nesti sentíu lazó un mensaxe al candidatu socialista, Adrián Barbón. “N'IX nun nos fiamos de la capacidá d'incidencia que tenga la FSA nel Gobiernu de Sánchez, porque lo vimos, fueron incapaces d'aprobar l'estatutu de la industria electrointensiva asturiana”. Nun creemos a Adrián Barbón, dixo Zapico, cuando diz que cola FSA yá hai representación nel Gobiernu de Pedro Sánchez. “La representación, la capacidá d'influencia énte’l gobiernu de Pedro Sánchez solo la va poder exercer un gobiernu de la izquierda plural, fuerte”, concluyó.

Volver

Compartir

2014 Izquierda Xunida d'Asturies - Política de privacidad - Política de cookies