Menu

Ángela Vallina anuncia que se va dirixir al Conseyu de Gobiernu por que se esclarien qué bienes pasaron a posesión de la ilesia al traviés de les inmatriculaciones ensin aportación de títulu dalgunu de propiedá.

IX reclamó güei la efectiva separación de la Ilesia y l'Estáu, y la supresión de los privilexos a la institución relixosa. La vocera de la formación na Xunta Xeneral del Principáu d'Asturies, Ángela Vallina, entrevistóse esta mañana con representantes del Grupu contra les inmatriculaciones d'Asturies, la Coordinadora Recuperando y Asturies Laica pa falar de la situación na Comunidá Autónoma, dempués de que'l pidimientu d'información sobro los bienes apropiaos pol arzobispáu quedárase nuna mera relación nominal, ensin datos concretos sobro cada elementu patrimonial nin, nun llistáu que nin siquier se recueyen la totalidá d'estes propiedaes que, per esta vía, pasaron a manos de la Ilesia Católica.

Ángela Vallina reprochó que, a día de güei, la separación ente Ilesia y Estáu nun sía una realidá efectiva y reclamó midíes pa recuperar los bienes apropiaos por aciu inmatriculaciones que, dixo, "son patrimoniu de tola sociedá".

La diputada criticó amás que se beneficie a la Ilesia cola exención d'impuestos como'l de Bienes Inmuebles (IBI), inclusive en propiedaes que nun se dediquen al cultu y que son en realidad negocios ayenos al mesmu. Nesti sentíu, amosó la so disconformidá colos planes del Conceyu d'Uviéu que pretende paralizar el fin de les exenciones que s'alcordara nel anterior mandatu.

Pela so parte, Txema Rosell, del Grupu de Inmatriculaciones, esplicó que volverán pidir aclaraciones sobro les propiedaes inmatriculaes pola ilesia, polo que yá se dirixieron a la Comisión de Pidimientos y Derechos Fundamentales por que, dende'l Rexistru de la Propiedá, apúrranse toles notes simples de cada unu de los bienes inmatriculados dende 1978 ensin aportación del títulu de propiedá.

Izquierda Xunida va pidir amás al Conseyu de Gobierno información sobro los bienes inmatriculados.