Menu

La formación, según esplicó'l coordinador xeneral, Ovidio Zapico, yá treslladó a Izquierda Xunida Federal les sos propuestes -como una aportación- por que pueda encetase pol executivu nacional

El coordinador xeneral d’IX Asturies, Ovidio Zapico, aseguró güei que ye imprescindible l'adopción de midíes complementaries qu'embriven l'impactu del estáu d'alarma especialmente pa les persones nuna mayor situación de vulnerabilidá. "Mientres la mañana estuviemos trabayando nel senu del grupu parlamentariu nuna serie de midíes que yá mandamos a propósito a los compañeros d'IX Federal", esplicó'l dirixente, enmarcándo'l pidimientu como una "aportación" al Conseyu de Ministros que tendrá de celebrase mañana. "Entendemos que'l Conseyu de Ministros tien que salir con propuestes clares, con midíes concretes que dexen embrivir les consecuencies social y llaboral d'esta situación a el trabayadores, a los autónomos, a los más desfavorecidos de la sociedá. Con esi ánimu unviamos eses propuestes a los compañeros d'Izquierda Xunida Federal".

L'actividá parlamentaria física foi suspendida na Xunta Xeneral del Principáu d'Asturies qu'esta mesma mañana, y per vegada primera, celebró una xunta de la Mesa de forma virtual. Ovidio Zapico, secretariu d'esti órganu parlamentariu, esplicó qu'eses videoconferencias múltiples van ser, mientres dure l'estáu d'alarma l'alternativa pa garantizar l'actividá del Parlamentu: "tol trabayu tien que ser non presencial. Creemos que ye una forma d'ayudar a apangar l'espardimientu del coronavirus per Asturies".

Asina, esta mesma selmana ta prevista una xunta virtual de tolos voceros parlamentarios col Conseyeru de Sanidad Pablo Fernández Muñiz pa encetar la situación n'Asturies de la pandemia.

El coordinador xeneral d’IX Asturies fixo un llamamientu a la esperanza con un mensaxe d'ánimu pero tamién de "disciplina" como meyores víes pa encetar la crisis sanitaria. "Vamos superar esta situación. Falta un día menos yá por que la superemos. Tenemos que siguir cumpliendo con tolo que nos encamienten les autoridaes santarias; tenemos que siguir collaborando col Gobiernu Central y col Gobiernu d'Asturies".

Ovidio Zapico quixo estimar especialmente a toles persones que, a pesar del Estáu d'Alarma caltiense nos sos puestos de trabayu por que la sociedá siga en marcha. "Hai que dirixise a los y les trabayadores de la sanidá pública, hai que dirixise a tresportistes; quiero especialmente estimar a esa persones que güei, bien temprano, y magar la nieve, punxo'l pan a la puerta de la mio casa", señaló'l diputáu, que vive n'una d'eses localidaes de la "Asturies balerada" y na qu'estos suministros son fundamentales pal día ente día.

De la mesma, añedió, "quiero estimar a tolos compañeros y compañeres que trabayen nos supermercaos, a última hora, a toa esa serie de persones que tán faciéndonos la vida estos díes un pocu menos difícil".