Menu

El diputáu visitó güei los terrenes que dispon el Conceyu y que seríen un llugar “fabulosu" pa la construcción del nuevu equipamientu, col qu'amás se cumpliría l'alcuerdu de Gobiernu qu'incluyía una residencia pa mayores.

Izquierda Xunida propunxo güei que Navia acueya'l primer proyectu piloto d'un nuevu modelu sociosanitariu acordies a les necesidaes que se detectaron de resultes de l'alarma sanitaria pol coronavirus na rede d'establecimientos residenciales. El diputáu Ovidio Zapico esplicó güei, mientres una vista al conceyu, que'l pactu de Gobiernu ente la so formación y el PSOE na Alcaldía inclúi la construcción d'una nueva residencia pa persones mayores que, al so xuiciu, tien d'afaese yá a les nueva situación aniciada pola pandemia del COVID-19.

En Navia, recordó Zapico, l'alcuerdu de Gobiernu tien de cumplise y, dientro del mesmu, inclúyese la construcción d'un xeriátricu: "hai terrenales como'l que tamos visitando que'l Conceyu podría poner a disposición del Principáu y güei lo que plantegamos equí ye que s'empecipien tolos trámites"

Sicasí, tres la crisis sanitaria, Ovidio Zapico apostó por replantegar la idea orixinal: "hai qu'avanzar escontra esi nuevu modelu sociosantiariu y que terrenes como ésti podríen ser un bon llugar por que'l nuevu proyectu piloto, en redol a lo que tien que ser esi nuevu modelu, pueda surdir. Equí puede ser un llugar fabulosu, nuna redolada bien saludable, con metros cuadraos bastantes y podríamos, a última hora, llanzar un proyectu novedosu de lo que tien que ser esi futuru de les residencies pa persones mayores, nesti casu, nel Occidente d'Asturies".

Pela so parte, la conceyala de Servicios Sociales y Mayores resaltó la necesidá de cuntar con una nueva residencia en Navia yá que la qu'anguaño esiste nesi conceyu ye obsoleta. "Tenemos unos terrenes equí por que'l Principáu pueda faese cargu d'ellos y faer la residencia".

Ovidio Zapico movióse güei hasta Navia pa conocer in situ los terrenes.