Menu

Ovidio Zapico estima la rapidez na respuesta y cree que la presión vecinal y político fue decisiva

Confederación Hidrográfica del Cantábricu anunció la realización inminente de nueves comprobaciones na canal de la Central de Camporriondi, n'Amieva, que se van sumar a otres inspecciones, yá realizaes, coles mires de garantizar la seguridá de la canal que punxo en fierros a la población de San Román. Cofederación unvió esta mesma selmana una respuesta al diputáu de IX Ovidio Zapico, quien se dirixera al ente, énte les demandes vecinales, al constatar perdes nesta canalización. Pal parllamentariu, la presión vecinal y político tán siendo decisives polo que, enfatizó, IX va caltener l'atención sobro la situación d'esta infraestructura hidráulica.

"De primeres, estimar esa respuesta que foi bien rápida y amosar tamién el nuesu prestu porque paez que la presión vecinal y tamién la presión política empieza a surtir efectu", señaló Zapico, pa quien les inspecciones regulares son entá más necesaries anque solo sía pola antigüedá d'esta infraestructura.

La esmolición vecinal surdió dempués de que se detectaren perdes importantes na canal al so pasu pola localidá de San Román. "D'equí solo cabo salir con una inspección y con una, de siguío, acometida de les adecuaciones necesaries", aprofió Zapico.

Sía que non, anunció'l diputáu, "nós vamos siguir vixilantes y vamos siguir perseverando na nuesa acción de llograr, quien sía'l responsable, que n'esti casu too paez indicar que ye la empresa privada concesionaria de la canal la que ta obligada a executar eses inversiones y adecuaciones, faciéndolo yá lo más llueu.

Ovidio Zapico, al pie de Julio José Martínez, d’IX Amieva, visitó San Román hai apenes dos selmanes, onde s'axuntaron con representantes de l'Asociación Recreativa y Culltural El Texu, precisamente pola esmolición del deterioru de la canal.