Menu

Ovidio Zapico pide a Melania Álvarez qu'esclarie si va lliberase los 800.000 € del presupuestu apautáu con IX pa entidaes sociales

Izquierda Xunida treslladó güei el malestar de los colectivos sociales y la escasa fluidez del diálogu cola Conseyería de Derechos Sociales. El diputáu Ovidio Zapico aseguró que les entidaes del Tercer Sector, de forma repitida, aseguren qu'esiste una falta de comunicación total y absoluta", daqué qu’al so xuiciu tien que resolvese. Frente a la situación, el parllamentariu reclamó a la Conseyera Melania Álvarez, que reabra víes p’ameyorar l'entendimientu: "hai que falar yá d'una forma sincera y abierta colos diversos representantes del Tercer Sector. Ye daqué que ye la mio obligación güei esixi-yos".

Zapico recordó qu'IX lleva nel so "ADN" l'acción en materia de polítiques sociales que, recordó, la organización dirixió ya impulsó en delles llexislatures n'Asturies: "y siempres tuvimos una relación fluyida dende l'acción de Gobiernu col Tercer Sector y, agora, tal paez que mientres los últimos años ta dexándose la xestión d'esta Conseyería al influxu de lo que fueron aquellos años que, desgraciadamente, yá van quedando bien tras y que nun podemos vivir d'esos impulsos".

El diputáu, nun alderique por momentos tirante, reclamó amás a Melania Álvarez qu'informe sobro la situación de los 800.000 euros conseñaos nel presupuestu pa 2020 apautáu por IX y PSOE pa les entidaes sociales."Hai una segunda cuestión que tamién quixera qu'ustedes me respondieren que nos esmolez bien d’ello y, amás, con un sí o un non nun se contesta: y ye les retenciones, les paralizaciones de les subvenciones xenerales a les entidaes que son 800.000 euros nesi presupuestu que tenemos, aportuno y recuerdo una vegada más, robláu y aprobáu conxuntamente pola Federación Socialista Asturiana (FSA), el so grupu parlamentariu y el nuesu, si ye verdá o si nun lo ye?"

Ovidio Zapico resaltó “l'enorme esfuerzu realizáu poles entidaes sociales mientres la pandemia pa poder desenvolver la so actividá que, amás, y precisamente pola crisis sanitaria, tuvo un sobrecostu terrible".

IX reclamó amás que se ponga en marcha una estratexa específica pa los colectivos de discapacidá y na llucha contra la probeza. "Queda una cuestión qu'hai que resolver, qu'imaxino que la pandemia, nel so momentu paralizara pero qu'hai que resolver yá: y ye l'acción alcordada; en función del tipu de discapacidá".

A lo llargo de la intervención, producióse dalguna fregadura ente diputáu y Conseyera que'l parllamentariu trató de rebaxar con un toque d'ironía: "veo que nun-y tán gustando les mios entrugues polos xestos que me ta poniendo; veo que nun-y gusten les entrugues; yo espero que me gusten les sos respuestes".