Menu

Ángela Vallina y Ovidio Zapico creen que se perdió una "oportunidá" pa la rexeneración democrática que llueñe de favorecer a la monarquía perxudicala por tratar de despintar los escándalos del anterior xefe del Estáu.

Izquierda Xunida d'Asturies llamentó güei que PSOE, PP y Ciudadanos torgaren encetar la revocación de la medaya que, nel so momentu concedió la Xunta a Juan Carlos de Borbón cuando inda yera Xefe del Estáu. IX llevó güei a la mesa de la Cámara esta propuesta que, sicasí, nun va poder llevase adelantre énte la negativa d'eses trés fuerces. "Entendemos que lo que güei decidieron el Partíu Socialista, el Partíu Popular y Ciudadanos ye siguir intentando caltener una España irreal, una España difusa,una España que nun s'afai colos tiempos y lo que tamos conociendo de les actividaes de Juan Carlos de Borbón y Borbón", afirmó Ovidio Zapico.

Sofitu de Podemos Asturies

Na mesma posición que IU Asturies ta Podemos que treslladó, al traviés del diputáu Rafael Palaciu, el so sofitu a la iniciativa d'encetar la retirada de la reconocencia al anterior xefe del Estáu énte los escándalos amestaos al so reináu. Güei mesmu, súpose que'l xuez reabrió la pieza de los audios que chisquen al padre del rei ya imputáu a Corinna Larse, a la que, supuestamente, Juan Carlos de Borbón regalaría de forma opaca y si declarar a Facienda como donación y, por tanto, ensin tributar, 65 millones d'euros de procedencia non abondo esclariada.

Pa la vocera d'IX na Xunta Xeneral, Ángela Vallina, la decisión de la mesa ye un erru, sobremanera, añedió, "dende'l puntu de vista de la hixene democrática, porque equí nun tamos falando de modelu de monarquía o república, tamos falando d'unos fechos bien graves que se producieron a lo llargo del so reináu".

La diputada aseguró que, na so opinión, esti tipu d'acciones obstruccionistes son una equivocación. "Nun tán con ello reforzando a la monarquía, sinón tolo contrario. Tán torgando la so rexeneración y tán fundiéndola más. Creo que s’equivoquen na so estratexa, sobremanera si se dan cuenta qu'el so propiu fíu, l'actual rei, retiró-y l’asignación". Ello ye que nesti escenariu, la persistencia de PSOE, PP y Ciudadanos en siguir despintando y tapando ye un favor "bien flacu" a la monarquía.

Pa Zapico, perdióseuna oportunidá de rexeneración democrática importante que, significa, qu'hai una serie de partíos que nun quieren pasar páxina: "quieren siguir fondiaos na España de les prebendes, na España, polo tanto de les desigualdaes".