Menu

Ovidio Zapico esixe garantíes na protección de los derechos llaborales nos itinerarios d'emplegu de les persones beneficiaries de polítiques de d'insertamientu llaboral

El diputáu y coordinador xeneral d’IX Asturies, Ovidio Zapico, defendió güei amontar "tolo que sía posible" la implementación del Ingresu Mínimu Vital (IMV) n'Asturies para dexar lliberar recursos que tienen de ser destinaos a otres polítiques sociales. El parllamentariu, mientres la so vez p’afitar posición respecto al presupuestu de la Conseyería de Derechos Sociales y Bienestar, aseguró qu'esi aforru na nómina del Salariu Social, si tomen les decisiones fayadices, "van podese faer polítiques bien ambicioses en materia social n'Asturies, porque va entrar una cantidá de dineru significativo".

Pa Zapico, la estensión del IMV tien de dexar avanzar en más polítiques sociales que dexen "amenorgar la desigualdá". El diputáu reclamó tamién midíes pal insertamientu llaboral, eso sí, con garantíes en materies de derechos de les persones que, beneficiaries de Salariu Social, incorporrnse al emplegu. "Frente a les engalimes de la derecha, ye bien importante dexar, alto y claro, que nenguna persona del Salariu Social va trabayar por daqué que nun tea regulao en nengún conveniu colectivu".

ERA

Tocantes a la rede residencial para persones mayores d'Asturies, ERA, Ovidio Zapico defendió que la residencia de Llugones ábrase como centru social. "Vamos ver cómo ye la evolución y esperemos que nun sía más grave de lo qu'agora mesmu tenemos de la pandemia, que nos dexe, nel plazu de bien pocos meses, encetar yá l'apertura definitiva pa lo que foi concebida, que nun ye otro que pa centru residencial de persones mayores".

El parlamentariu amosóse satisfechu énte l'asunción, per parte de la Conseyería de Derechos y Bienestar Social, de la esixencia d'IX pa caltener les TECAEs nocherniegues, por planta, en residencies. "Agora los sindicatos, el Comité d'Empresa y l'ERA tienen que definir cómo encetar esa negociación en redol a esa meyora retributiva".

Llistes d'espera

No relativo a llistes d'espera, Zapico aseguró que, nestos momentos, "toca" poner al día la valoración de la discapacidá, pa lo que la Conseyera Melania Álvarez anunció una midida que nun ye cien per cien pública. Nesti sentíu, el diputáu señaló qu'el so grupu va aceptar esi modelu, eso sí, respetándose dos premises: "el so calter escepcional y el so calter temporal. Nun lo entendemos más que como una midida escepcional pa superar la situación qu'agora vivimos, tamién, de falta de profesionales notros ámbitos del sistema non yá sociosanitariu sinón tamién sanitariu, como puedan ser los médicos, y qu’esta midida va tar acutada nel tiempu a la conclusión d'estos trabayos qu'usté cifró d'equí a que termine la llexislatura".