Menu

Ángela Vallina reclama la necesidá d'un plan global y un calendariu d'inversiones alcordáu poles fuerces democrátiques que dexe "revertir" el cayente del oeste asturianu

Izquierda Xunida va proponer un pactu pol suroccidente que dexe articular un plan global y un calendariu d'inversiones pa revertir el cayente del oeste asturianu. La iniciativa, cola que pretende dar respuesta a les necesidaes d'una zona ablayada y con unes comunicaciones deficientes, foi anunciada esta mañana pola vocera, Ángela Vallina, mientres el Plenu de presupuestos, onde Podemos y PP pretendíen incorporar enmiendes, en teoría, pa conseñar más inversión nes carreteres d'estes contornes. Sicasí, pa la diputada, eses iniciativa nacen viciaes, respondiendo más al tacticismu políticu qu'a un interés real de buscar soluciones. "El mio grupu parlamentariu presentó una interpelación urxente que se sustanciará nel primer plenu del próximu periodu de sesiones por que'l Gobiernu esplique nesta Cámara qué midíes va tomar p'ameyorar la situación del suroccidente asturianu. Y, n'esi marcu, esti grupu va proponer un pactu pol suroccidente asturianu por que sía alcordáu po les fuerces democrátiques y que contemple globalmente les sos necesidaes específiques y estableza un calendariu d'inversiones pa encetales n'harmonía coles del conxuntu d'Asturies".

Al respective de les enmiendes de Podemos y PP, más allá de la necesidá real d'inversiones en materia de carreteres, Vallina aseguró que supon "tirar la piedra y esconder la mano", por culpa de que nun s'esplica qué otres zones van vese afectaes. Según Vallina, estos grupos, coles sos iniciatives aprovéchense del "enorme malestar ciudadanu" que se vive nesa contorna y que, añedió, tamién comparte IX, al igual que la necesidá de les inversiones que se plantegen. Sicasí, reprochó la diputada, "eses enmiendes tienen un problema, y ye que se financien cola partida xenérica d'inversiones qu'apaez nel proyectu de presupuestu y que la so concreción, como tol mundu sabe, ta contenida nel anexu d'inversiones. La entruga ye ¿cuál de les más de 120 actuaciones nes carreteres asturianes previstes nel anexu d'inversiones suprímense pa financiar les propuestes na so enmienda d'aproximamientu? ¿Cuántes, cuántes más tenemos que quitar?"

El planteamientu de pidir ensin esplicar les sos implicaciones pal restu d'Asturies ye, señaló Vallina "un tanto cobarde" que sigue la lóxica d'una política tramposa: "hai qu'esplicar d'ónde se saca antes de dicir onde quier metese porque si non, ta faciéndose demagoxa que ye l'idioma que fala'l populismu".

Frente a esi populismu, IX realizó esti llamamientu pa encetar les necesidaes del occidente d'Asturies de cara a llegar a un alcuerdu ente les distintes fuerces democrátiques del Parlamentu d'Asturies: "Queremos un alcuerdu que sirva pa revertir la situación y tamién pa frenar el populismu y la demagoxa na que dalgunos tán cayendo nesti asuntu. Señoríes, alcordemos y avancemos".