Menu

Izquierda Xunida llamentó güei la medría de los delitos contra la llibertá sexual de les muyeres, y, d'estos, los perpetaos en grupu, nuna dinámica qu'a xuiciu de la vocera de la formación, Ángela Vallina, vese animada polos discursos misóxinos y negacionistes de la ultraderecha sobro les violencies machistes en toles sos aguaes.

Vallina fixo amás un llamamientu a los partíos democráticos pa refugar los discursos machistes que van contra la igualdá efectiva ente homes y muyeres. Vallina reconoció qu'Asturies, al pie de Estremadura, ye la Comunidá con menor índiz de delincuencia d'España, que, de la mesma, ye unu de los más seguros de la Unión Europea y del mundu. Sicasí, xustificó la esmolición por culpa de qu’esa medría oldea col amenorgamientu de la criminalidá polo xeneral. Pa faer frente a la medría de les violencies machistes, Vallina emplazó a "toles fuerces polítiques democrátiques"a refugar el blanquéu de los discursos que cuestionen principios tan elementales como la igualdá d'homes y muyeres y la llibertá y el derechu a la indemnidad física y moral.

"Les campañes institucionales que se faen pa defender esi derechu de les muyeres asturianes a poder tar nuna fiesta de práu hasta la hora que quieran y volver a la so casa ensin la medrana de ser afrellaes por una peada de miserables, tien de poner l'acentu non yá en defender a les víctimes y animales a que denuncien cualquier situación intolerable sinón tamién n'esmazcarar a los victimarios y a los discursos que los afalen. La llibertá de les muyeres, como la de los homes, ye sagrada y nun podemos tolerar nada nin a naide que lu ponga en cuestión".

"La entruga que tenemos de faenos ye por qué se produz esta medría de delitos contra la llibertá sexual de les muyeres, cometíos amás en grupu, ye dicir de manera llaina y cobarde. Al mio xuiciu esa medría debese a qu'hai grupos políticos ya ideolóxicos que, na so guerra cultural contra los valores de la igualdá y la democracia, a los que definen despreciatible y falsamente, como'l consensu progre, contribuyeron a embrivir la gravedá d'atentar sexualmente contra una muyer porque aportunen n'afalar la xustificación de la desigualdá".

Vallina realizó estes reflexones a lo llargo de la sesión plenaria de güei, na qu'amás preguntó sobro les midíes que'l Gobiernu d'Asturies piensa poner en marcha cola fin d'amenorgar los riesgos pa les muyeres. Polo pronto, según señaló güei el vicepresidente Juan Cofiño, el Centru de Crisis pa Víctimes d'Agresiones Sexuales va incorporar el próximu mes a un equipu especializáu en víctimes menores d'edá, una noticia necesaria, acordies cola diputada. El personal de refuerzu va dexar cuntar con un psicólogu y un abogáu pa suplir una falta qu'esistía nel centru y ameyorar asina l'atención.