Menu

Ángela Vallina reprocha al Conseyeru Enrique Fernández el "notable" nivel d'improvisación na materia y cree que se ta atendiendo más a los intereses de les empreses qu'a les necesidaes reales d'Asturies

Izquierda Xunida pidió güei al Conseyeru d'Industria, Enrique Fernández, que presente una planificación sobro'l sector de xeneración d'eletricidá n'Asturies, de la que reprochó'l "notable nivel d'improvisación" del Executivu asturianu en materia enerxético . La vocera Parlamentaria, Ángela Vallina, aseguró que la política esplegada pol executivu autónomu nun respuende a "una planificación serio y coherente basada nun estudiu de necesidaes de demanda y de capacidá tecnolóxica y territorial de producción p'atender a esa demanda sinón al impulsu de les grandes empreses enerxética en proyectos financiaos a golpe de talonariu de dineru público. Esti grupu parlamentariu nun tien nenguna información que sirva pa desmentir esa sensación". Sía que non, la diputada reclamó una propuesta de planificación enerxética "socialmente sofitada" p'aldericala nel Parlamentu.

Y ye que, precisamente no referío al futuru de la xeneración eléctrica, ta unu de los puntos de mayor resfregón d'IX col Gobiernu asturianu. Esa ye la fonderada política de la interpelación, según reconoció la mesma Ángela Vallina, que nun duldó n'asegurar que se trata de la "mayor discrepancia" hasta'l momentu, y que "xeneró y sigue xenerando esmolición nel mio grupu parlamentariu. Por eso acabo pidiéndo-y que traigan ustedes a esta Cámara xuna propuesta de planificación enerxética socialmente sofitada p'aldericala nesta Cámara. Apurran lluz a esa parte de la so acción política".

La opacidá sobro la planificación enerxética xenera la sensación" de que'l gobiernu y mesmu Conseyeru "tán abducíos polos proyectu enerxéticos y prioricen el so desenvolvimientu y financiamientu con fondos europeos más y percima de cualesquier otru proyectu industrial o tecnolóxicu"

Ángela Vallina pidió a Enrique Fernández qu'esplique cuántos puestos de trabayu directos, indirectos o inducíos crea un parque eólicu de los previstos nel occidente asturianu, más allá de los que se deriven de la so construcción. La vocera espresaba asina la so medrana al escasu impactu que va tener pal desenvolvimientu d'eses zona esti tipu de proyectos: "voi contesta-y, ente pocos y bien pocos. Ya inda habría que ver si esi balance de creación d'empléu ye positivu si descontamos los que pudieren perdese por aquelles actividaes que son incompatibles con esos parques, como'l turismu rural, por casu"

Frente al apueste cerriscu por proyectos enerxéticos, Ángela Vallina defendió que p'Asturies ye más importante "acoricar" la industria, favorecer la so modernización, diversificación, digitalización y crecedera qu'enllantar un parque eólicu, "porque la industria crea emplegu y el parque eólicu non. Y eso ye lo qu'el mio grupu cree que'l gobiernu, y particularmente la so conseyería, nun ye capaz d'entender".