Izquierda Xunida fai un llamamientu a los partíos democráticos pa frenar los discursos del “odiu” y faer "muro" frente a ideoloxíes que fai 86 años “promovieron l'asesinatu de García Lorca por colloráu y por maruxu”
La vocera d'Izquierda Xunida. Ángela Vallina, denunció güei la puxanza d'ideoloxíes de "odiu" escontra colectivos vulnerables y l'andada de delles fuerces polítiques que vencen a la presión de la ultraderecha. La diputada punxo como exemplu la comunidá madrilana que pasó de ser un vanguardia en diversidá sexual a convertise n'unu de los exemplos de la involución, frutu del siguidismu. "Acabamos de ver cómo Madrid nun va poner la bandera LGTBI, ¡qué vergüenza".
Y ye qu'esta mañana la Xunta aldericaba una Proposición non de Llei de Foro Asturies sobro adopción de midíes en favor del colectivu LGTBI, una iniciativa, a xuiciu de Vallina, que llega nel momentu oportunu y nel marcu del día del Arguyu.
Ángela Vallina arrincó la so intervención acometiendo contra la diputada ultraderechista Sara Rouco: "nin feminismu radical, nin l'otru inventu de feminismu lliberal, feminismu, puru y duru. ¿Sabe usté lo que significa feminismu? I-gual-dá. Y puntu; nun-y pongan calificativos. Nun inventen. Nun inventen llinguaxes nin nueves versiones de too".
La parllamentaria recordó que los seres humanos nacen llibres ya iguales en dignidá y en derechos, ensin distinción dalguna. Por eso, remarcó, "les persones LGTBI tienen los mesmos derechos que les persones que nun lo son. Ye lo propio d'una sociedá diverso y respetuoso cola diversidá de xéneru, capaz de erradicar l'odiu y les discriminaciones, pa siguir afondando na democracia y los sos derechos. D'una sociedá digna, en definitiva".
El problema nestos momentos ye la ocupación del espaciu público y mediático de discursos de quien cuestionen y desprecien los valores de la igualdá y tolerancia que, hai enfatizado Vallina, "según les sos reflexones ponzoñoses, ye la espresión d'una supuesta decadencia social y cultural". Lo peor, señaló la diputada, ye qu'esi tipu de planteamientos discriminatorios que desprecien al distintu nun son nuevos. "Hai esactamente ochenta y seis años, casi un sieglu, los padres d'esa ideoloxía d'odiu asesinaron a García Lorca por colloráu y por maruxu. Por eso, les fuerces polítiques democrátiques tenemos la obligación frenar estos discursos del odiu que dende va dalgún tiempu viénense escucháu, faciendo muriu pa concenciar a la sociedá por que toes les persones ensin importar la so identidá o la so orientación sexual puedan exercer, ensin mieu y con respetu, toles facultaes y derechos que-yos correspuenden como ciudadanos y ciudadanes de plenu derechu".
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies