Menu

El diputáu pide al Gobiernu reorganizar el SUAP d'Atención Primaria y abrir l'alderique.

El diputáu y coordinador xeneral d'IX, Ovidio Zapico, encamentó güei al Gobiernu d'Asturies a encetar soluciones para reforzar el sistema sanitariu, con una reorganización del serviciu d'urxencies d'Atención Primaria (SUAP), dientro d'un marcu global pa optimizar recursos y que sirva pa embrivir los impactos del déficit de personal y que yá obligó a la contratación de médicos estranxeros. Amás, reivindicó la necesidá d'abrir, nel mediu plazu, l'alderique sobro la formación universitaria y los numerus clausus, énte la falta de profesionales pa cubrir les necesidaes presentes y futures. Zapico sollertó que los fallos del propiu sistema sanitariu asturianu vense constataos na iniciativa d'un grupu médicu priváu p'abrir un hospital en Xixón. El parllamentariu dirixióse güei al Conseyeru de Salú, Pablo Ignacio Fernández Muñiz, precisamente, pa saber cómo piensa encetar el departamentu la posible fuga de personal dende la yá tensionada rede del SESPA escontra esi centru del Grupu Quirón. "Daqué ta pasando cuando una empresa privada cree que puede haber un marxe nuna Comunidá Autónoma, amás, como la nuesa, coles sos particularidaes sociolóxiques, demográfiques, que dexara una inversión d'esi caláu".

Zapico amosó la esmolición pola actual falta de profesionales sanitarios yá que, al so xuiciu, supón un elementu adicional de peligru pal sistema sanitariu públicu que va tener, amás, que competir pa poder asegurar la prestación de los sos servicios dende la perspectiva de la suficiencia de los recursos humanos. "Cónstanos yá que tán empezando a captar profesionales: tán buscando radiólogos, tán buscando anestesistas y tar buscando en profesionales que trabayen no público", sollertó'l dirixente d'IX. Frente a ello, el diputáu pidió que se dean respuestes pa evitar el deterioru del sistema públicu, que ye, al so xuiciu, lo que quieren los grupos sanitarios privaos. "Quieren un sistema públicu débil, por que munchos güeyos ponense nellos y por que, aquellos que puedan pagalo, alleguen a les sos clíniques privaes; a midida que devalúese'l sistema públicu más posibilidaes de negociu van tener ellos".