Ángela Vallina reprocha que s'ufierte más información sobro Fondos Europeos a la Cámara de Comerciu d'Uviéu qu'a la Xunta Xeneral
Izquierda Xunida refugó güei na Xunta Xeneral la posibilidá d'apurrir la xestión de los Fondos Europeos a entidaes privaes, alternativa que foi desvelada pol presidente de la Cámara de Comerciu d'Uviéu, Carlos Paniceres, tres un alcuentru col titular d'Industria, Enrique Fernández. La vocera d'IX, Ángela Vallina, amosóse bien crítica con esta opción que, al so xuiciu, supondría dexar en manos d'intereses privaos y empresariales unos recursos que tienen de ser alministraos dende lo público, atendiendo namái a llograr el máximu beneficiu xeneral. Frente a ello, defendió una "alianza progresista" que dexe encarar el futuru inmediatu movilizando, "dende güei", la base social
Ángela Vallina, na entruga al Presidente, amosó'l cansanciu énte "determinaes relaciones de parte del so Gobiernu con dellos intereses que consideramos que son privaos y empresariales. Y afítese que nun dicimos con empresarios, pos rescampla que cuntar col empresariáu ye imprescindible pa l'acción de cualquier gobiernu. IX, que tien esperiencia de gobiernu en tolos niveles, nunca refuguemos les normales relaciones con esa parte de la sociedá y de la economía. Al contrariu, cultivar ensin sirvinos d'elles".
La vocera d'IX llindó esa esviación a "una parte" del Gobiernu que, na so opinión "tien una axenda propia y compartida con intereses empresariales. Y esa parte del gobiernu vien dacuando a esta Cámara a tratar despreciatible y despóticamente a los grupos parlamentarios que defendemos los intereses xenerales, col nuesu puntu de vista, tan lexítimu como'l de cualesquier otru. Ensin dulda, esto deteriora'l clima d'entendimientu de la izquierda y faise pa, deliberadamente, asitiar a tol gobiernu a mercé d'influencies esternes a esti parlamentu". La diputada esplicó que la deriva nesa parte del executivu d'Adrián Barbón, con “axenda oculta”, utiliza a representantes públicos que "desconectaron de la realidá social y tráennos una llei, por casu la calidable Ambiental o un planteamientu sobro Fondos Europeos que, hasta agora, yera opacu. Sicasí, paez que la Cámara de Comerciu d'Uviéu, per boca del so presidente, va esclariándonos o intenta esclariar lo que cree que tien de ser la estratexa gubernamental d'esos fondos al traviés d'un pronunciamientu públicu realizáu dempués d'una xunta xuntu al Conseyeru d'Industria".
Ángela Vallina llamentó que la Conseyería, a pesar de cuntar con una Alianza pola Industria, na qu'hai más axentes socioeconómicos, informe d'estos fondos al traviés de los medios de comunicación y en compañía del empresariáu de la Cámara habitual. Y ye que, enfeó la parllamentaria, "nin un solu alderique nesta Xunta Xeneral foi provocáu pol Gobiernu pa falar de la estratexa xeneral y de los oxetivos de los Fondos Europeos qu'agora se suxuren que sían privatizaos y qu'usté acaba de desmentir, pero nengún alderique foi promovíu pol Gobiernu pa falar de los Fondos, nengunu, toos fueron promovidos pola oposición".
Pa IX, l'entendimientu de la izquierda va afigurar nos Presupuestos Xenerales y na orientación xeneral de l'acción d'una mayoría d’investidura que decidió nun vencer énte la ofensiva fiscal conservadora. "Nun sé por qué nun s'afiten no que pasó en Gran Bretaña cola Primer Ministra y la so baxada d'impuestos, que tuvo que plegar veles porque fundía'l so país", aprofió Vallina dirixéndose a los grupos que piden rebaxes fiscales.
Vallina destacó qu'hai un alcuerdu pal desenvolvimientu de los servicios públicos básicos “pero eso nun basta énte lo que calificó como un intentu d'un núcleu del Gobiernu pa erosionar l'alianza progresista nunu de los sos núcleos fundamentales y árees como ye'l Mediu Ambiente, les reformes alministratives, los Fondos Europeos o la política industrial y enerxético”.
Pa la vocera d'IX, les declaraciones constantes "d'un empresariu intentando definir les polítiques del gobiernu na área económica y esibiendo un grau d'información pública mayor qu'el del Parlamentu indiquen "esi maridaje d'esti sector del so Gobiernu con intereses privaos, que nos paez que ye un desequilibriu":
Estos desencuentros suponen, según Vallina, un frente de resfregón que queda exemplificáu na falta de consensu de tola izquierda, nin de CCOO, el sindicatu mayoritariu, na Llei calidable Ambiental: "ye un fechu ensin precedentes nesta comunidá. Y alimentar los discursos más agresivos y con descalificaciones permanentes allóñanos de la sintonía estatal". Lo peor, ye la descalificación permanente: "paez que tamos cantelizándonos toos; recurrir al insultu, a la descalificación cuando daquién me lleva la contraria o nun opina como yo. Eso ye lo que ta, paez ser, de moda"
El futuru inmediatu, defendió Vallina, "va ser un gobiernu plural de la esquierda, pero namá si moviliza dende güei a la so base social. Les actitúes d'esi núcleu del Gobiernu son la puerta d'entrada a la derecha y, tamién, la puerta xiratoria pa quien güei quieran asitiar los sos votos públicos en defensa del interés que nun son los públicos". Ello ye que añedió la diputada, apurrir el mediu ambiente al dominiu priváu" o externalizar la xestión de los Fondos Europeos, ye unviar una "mala señal" pa movilizar la ilusión de la esquierda". Frente a ello, concluyó, "proponémos-y, por tanto, reforzar l'alianza progresista una y bones les aliances son les que frenen la involución política y, a última hora, nun apurrir nin los Fondos Europeos como lo que pretende o lo que propón esta Cámara de Comerciu d'Uviéu. Y solamente esclariar una cosa: ye meyor ser Sancho Banduyu porque hai que recordar que ye la representación del sentíu común y prácticu que tar dafechu desconectáu de la realidá".
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies