Menu

Jesús Iglesias denuncia que col sistema actual nun tienen en cuenta les particularidaes del sector

El senador d'IX per Asturies Jesús Iglesias pidió al Gobiernu qu'esplique si va camudar los criterios pa la concesión d'ayudes pa la recuperación ambiental n'esplotaciones mineres, tres el cese d'actividá. El parllamentariu denunció que, de nun faese, la práctica totalidá de los presupuestos conseñaos pa esti fin van quedar ensin executar, al nun afaese los requisitos esixíos a la realidá del sector mineru, daqué que na so opinión podría responder a una estratexa antemanada. “Presupuéstense cantidaes y depués nun s'executen porque s'atopen les escuses plausibles que dexen refugar les ayudes".

Nuna entruga escrita, Jesús Iglesias cita a HUNOSA como una de les empreses perxudicaes pol actual sistema de concesión d'ayudes. Asina, en 2014 la empresa pública allegó al programa d'ayudes pa cubrir costos escepcionales del zarru d'unidaes de producción basándose nel cese d'actividá de los pozos Candín y demás de Siero y nes necesidaes de rehabilitación de la escombrera del pozu Pumarabule. Sicasí, l'Institutu pa la Reestructuración de la Minería del Carbón y Desenvolvimientu Alternativu de les Cuenques Mineres refugó tal solicitú.