Menu

Los destinatarios van ser los mercadores de primera vivienda que tengan una renta familiar menor a 3,5 vegaes l’IPREM y que firmaren una hipoteca depués del añu 2000

Los destinatarios van ser los mercadores de primera vivienda que tengan una renta familiar menor a 3,5 vegaes l’IPREM y que firmaren una hipoteca depués del añu 2000

Izquierda Xunida d’Asturies va incluyir nel so programa electoral pa les prósimes elecciones autonómiques el compromisu d’abrir una nueva llinia d’ayudes pal pagu de les hipoteques. Ente la medra de los tipos d’interés son munches les families asturianes que lleguen a fin de mes con agobios nes sos cuentes familiares. Durante l’últimu añu y mediu’l Bancu Central Européu incrementó siete veces el preciu de los créditos p’adquirir una vivienda, lo que xenera dificultaes p’amortizar les viviendes adquiríes. Pa iguar esta situación Izquierda Xunida d’Asturies va comprometese en poner en marcha una llinia d’ayudes a la que van poder optar les persones qu’adquieran la so primera vivienda, constituyeran una hipoteca a partir del añu 2000 y tengan una ingresos, por unidá familiar, per baxo de 3,5 veces l’Indicador Públicu de Renta d’Efectos Múltiples (IPREM), que se sitúa aprosimadamente en 1.800 euros mensuales.

Esti compromisu, que va llevase a cabu si Izquierda Xunida gobierna n’Asturies, ayudaría a un númberu de families que ronda les 130.000, según los datos que manexa la Conseyería de Vivienda y que’l vienres dio a conocer el Coordinador  Xeneral d’Izquierda Xunida d’Asturies y candidatu a la presidencia del Principáu, Jesús Iglesias. La llinia d’ayudes va beneficiar por igual a quienes merquen una vivienda llibre qu’una protexida. L’ayuda va poder ser recibida polos demandantes mediante un pagu únicu añal.

Esta cuantía empobinada a meyorar la situación de los asturianos a la hora de facer frente a les sos hipoteques nun va condicionar nin hipotecar los presupuestos autonómicos, como aseguró Jesús Iglesias durante la so intervención xunta a Laura González, Conseyera de Vivienda y Bientar y Manuel Orviz, Director Xeneral de Vivienda.

L’obxetivu d’Izquierda Xunida d’Asturies ye caminar hacia’l reconocimientu de la vivienda como un derechu subxetivu de tolos asturianos. Pa ello va potenciar tamién una Llei Asturiana de la Vivienda y va impulsar que la nueva redacción del Estatutu d’Autonomía tamién incluya esti derechu constitucional.

La Conseyera de Vivienda y Bientar Social, Laura González recordó los compromisos cumplíos nesta llexislatura por Izquierda Xunida d’Asturies. Nestos últimos cuatro años pusiéronse en marcha más de 20.000 viviendes protexíes y durante’l mesmu periodu descendió l’incrementu constante del preciu de la vivienda, pasando del 17% de subida añal al 7% actual. Del mesmu mou duplicáronse les ayudes a la merca, la renta y la rehabilitación de viviendes, a les que s’empobinaron cerca de 54 millones d’euros. L’esfuerzu fechu nun ye, por embargu abondo, según Laura González. D’ehí qu’estes polítiques deban recibir l’impulsu del Gobiernu autonómicu durante les dos prósimes llexislatures p’algamar los resultaos afayadizos.