Menu

"Ye un fechu qu’Izquierda Xunida d’Ayer ta en condiciones de plantegar a la sociedá que somos una fuerza de Gobiernu". Asina se refería Alfredo González, candidatu a l’alcaldía d’Ayer

"Ye un fechu qu’Izquierda Xunida d’Ayer ta en condiciones de plantegar a la sociedá que somos una fuerza de Gobiernu". Asina se refería Alfredo González, candidatu a l’alcaldía d’Ayer, a les posibilidaes que tien la candidatura presentada’l vienres pasáu pa les prósimes elecciones. González presentó una llista compuesta con persones con esperiencia nel llabor municipal, mocedá y, sobre too, "ganes de trabayar ya iniciativa: homes y muyeres preparaos pa gobernar". Xunta al cabeza de llista, y actual conceyal, figuren: José Manuel Díaz Trapiello, María Eugenia Díaz Ordóñez, Tino Montes Díaz, María Ángeles García García, Juan Carlos Suárez, Ana Belén Gutiérrez, Macario Iglesias, Carolina Velasco, Héctor Teijeiro, Esperanza Sevillano, Ángel García Baizán, Inmaculada González, Justo Rodríguez, María Isabel García, Andrés Rodríguez, María Pérez y los suplentes Valentín Álvarez, María Chelo González y Marcelino Suárez. Jesús Iglesias y Ángel González, Coordinador Xeneral d’Izquierda Xunida n’Asturies y Viceconseyeru de Bientar Social, respectivamente, participaron nesti actu de presentación de candidatures nel que la Vivienda, el Bientar y l’Emplegu constituyeron tres claves importantes mesmo de l’aición de gobiernu n’Asturies como nel conceyu d’Ayer. Jesús Iglesias reconoció’l trabayu municipal del grupu n’Ayer y l’aciertu de la candidatura que reflexa les aspiraciones del conceyu, con opciones clares de gobiernu. El coordinador d’Izquierda Xunida recordó les aiciones llevaes a cabu nel conceyu ayerán: la entrega en 2006 de 56 viviendes de promoción pública, el programa de recuperación y tresformación de les cases escuela en vivienda, llevaes a cabu por VIPASA, l’avance del proyectu de meyora de les viviendes na zona d’Ollanco. Del mesmu mou, el Viceconseyeru de Bientar Social, Ángel González, adelantó los trámites fechos pola Conseryería de Vivienda y Bientar Social pa construyir un Centru Polivalente d’Atención a Mayores na parcela del Antiguu Institutu en Morea que tendrá 4.000 metros cuadraos y ente 100 y 110 places. El proyectu técnicu encargaráse en prósimes feches al organismu Establecimientos Residenciales Asturianos (ERA) pa qu’enantes d’acabar l’añu tea termináu. L’estudiu de detalle d’esti centru d’atención a mayores contemplará tamién viviendes.