Menu

IX va preguntar polos planes de calidá del aire de Xixón y va defender una PNL pa favorecer l'usu de la bicicleta

Gaspar Llamazares, voceru parlamentariu d'IX na Xunta Xeneral, alvierte de que'l nuevu modelu de financiamientu qu'axusta'l Gobiernu de Rajoy ye inaceptable pa Asturies yá que va suponer, al so xuiciu, una amenorga d'ingresos que va significar un retayu de la sanidá, de la educación, de los servicios sociales, la educación y la xusticia. Reclama al Gobiernu qu'acentúe la so posición política y busque aliances coles comunidaes autónomes na mesma situación. Asina mesmo pronunciose pela mañana al términu de la Xunta de Voceros na que dio a conocer los asuntos que'l grupu parlamentariu va llevar al plenu d'esta selmana, ente los que figura, la mentada entruga sobro financiamientu autonómicu. De la mesma, alvirtió qu'esti periodu de sesiones va ser definitivu, yá que se decide “si ye una llexislatura continuista o de cambéu”. IX apuesta, dixo Llamazares, porque sía un cursu de cambéu y nesi sentíu esplicó que'l grupu parlamentariu “va ser bien esixente col Gobiernu de Javier Fernández”, pero tamién “bien comprometíu” coles polítiques sociales y llucha contra la corrupción y pola tresparencia, la ordenación del territoriu y el mediu ambiente y, polo xeneral, coles polítiques qu'ameyoren la vida de los asturianos.

Gaspar Llamazares va preguntar sobro esa nueva propuesta nel modelu de financiamientu, que per una parte publicó'l Gobiernu y per otra FEDEA, la Fundación d'Estudios d'Economía Aplicada, que, a xuiciu del voceru d'IX, usase pa faer una especie de cálculu o balance. “Ye una propuesta inaceptable p'Asturies y nun nos val que'l Gobiernu considere qu'esa propuesta amenorga'l financiamientu de la comunidá autónoma, que ye asina, sinón que tome midíes p'afitar una posición compartida de los grupos parlamentarios asturianos y per otra parte qu'apaute coles comunidaes autónomes con situaciones similares una propuesta de financiamientu qu'ameyore l'actual y, sobremanera, ameyore'l financiamientu de los servicios públicos. “Cola propuesta actual de FEDEA, del grupu técnicu, Asturies non solo nun ameyoraría los sos servicios públicos, sinón qu'empioraría los servicios públicos, vería retayada la sanidá, la educación, los servicios sociales y la educación, y la xusticia. Queremos que'l Gobiernu acentúe la so posición, non solo retórica, sinón d'aliances”, esplicó.

De la mesma, el grupu parlamentariu d'IX va llevar al plenu preguntes sobro los planes calidable del aire de Xixón y Avilés, que son planes insuficientes y claramente continuistas, como señaló'l voceru d'IX. La coalición pide al Gobiernu qu'introduza aspeutos fundamentales: la negociación d'un plan d'inversiones coles empreses, porque “ensin eso nun va haber meyora de los índices de contaminación” y un plan de movilidá que dexe movese con menor impactu ambiental.

IX tamién emplaza al Gobiernu, al traviés d'una proposición non de llei, a adoptar midíes pa favorecer l'usu de la bicicleta que, per una parte, reclama ameyorar les víes qu'usen los ciclistes, firme y señalización, etc, ya introduza midíes de convivencia na carretera que, según Llamazares tán “inda bien llueñe de la realidá”. “Solo asina va ser posible ameyorar la movilidá y faer de la bicicleta un preséu de movilidá sostenible”, esplica'l diputáu d'IX.